ghulami aasmanon se nahin utri

Daro us vaqt se

tāñge ke aage

bhāgte ghoḌoñ ko

jab āñkhoñ pe pahne khopoñ se

bāhar nazar aane lagegā

aur vo chābuk chalāte kochvānoñ ke dikhā.e

rāstoñ ko chhoḌ kar

apnī manāzil apne raste ḳhud banā.eñge

tab un par chābukeñ jitnī paḌeñ sab be-asar hoñgī

Daro us vaqt se

piñjre meñ baiThe sabz tote

apne mālik kī raTā.ī boliyoñ ko bhuul kar

jab aise aise lafz sīkheñge

jinheñ paḌhte hī

lohe kī salāḳheñ Tuut jaatī haiñ

Daro us vaqt se

circus ke sheroñ ko

jab ik din jangaloñ kī

pur-fazā āzād duniyā yaad aa.egī

to vo apne hī trainer ko dabocheñge

aur us kī shāh-rag meñ daañt gāḌeñge

Daro us vaqt se

ai bālā-dasto

jab tumhāre zer-dastoñ ko

samajh aa jā.egī

un par ġhulāmī āsmānoñ se nahīñ utrī

Daro us waqt se

tange ke aage

bhagte ghoDon ko

jab aankhon pe pahne khopon se

bahar nazar aane lagega

aur wo chabuk chalate kochwanon ke dikhae

raston ko chhoD kar

apni manazil apne raste KHud banaenge

tab un par chabuken jitni paDen sab be-asar hongi

Daro us waqt se

pinjre mein baiThe sabz tote

apne malik ki raTai boliyon ko bhul kar

jab aise aise lafz sikhenge

jinhen paDhte hi

lohe ki salaKHen Tut jati hain

Daro us waqt se

circus ke sheron ko

jab ek din jangalon ki

pur-faza aazad duniya yaad aaegi

to wo apne hi trainer ko dabochenge

aur us ki shah-rag mein dant gaDenge

Daro us waqt se

ai baala-dasto

jab tumhaare zer-daston ko

samajh aa jaegi

un par ghulami aasmanon se nahin utri