غلامی آسمانوں سے نہیں اتری

ڈرو اس وقت سے

تانگے کے آگے

بھاگتے گھوڑوں کو

جب آنکھوں پہ پہنے کھوپوں سے

باہر نظر آنے لگے گا

اور وہ چابک چلاتے کوچوانوں کے دکھائے

راستوں کو چھوڑ کر

اپنی منازل اپنے رستے خود بنائیں گے

تب ان پر چابکیں جتنی پڑیں سب بے اثر ہوں گی

ڈرو اس وقت سے

پنجرے میں بیٹھے سبز طوطے

اپنے مالک کی رٹائی بولیوں کو بھول کر

جب ایسے ایسے لفظ سیکھیں گے

جنہیں پڑھتے ہی

لوہے کی سلاخیں ٹوٹ جاتی ہیں

ڈرو اس وقت سے

سرکس کے شیروں کو

جب اک دن جنگلوں کی

پر فضا آزاد دنیا یاد آئے گی

تو وہ اپنے ہی ٹرینر کو دبوچیں گے

اور اس کی شاہ رگ میں دانت گاڑیں گے

ڈرو اس وقت سے

اے بالا دستو

جب تمہارے زیر دستوں کو

سمجھ آ جائے گی

ان پر غلامی آسمانوں سے نہیں اتری