guru-nanak dev ji

tire jamāl se ai āftāb-e-nankāna

nikhar nikhar gayā husn-e-shu.ūr-e-rindāna

kuchh aise rañg se chheḌā rabāb-e-mastāna

ki jhūmne lagā rūhāniyat kā mai-ḳhāna

tirī sharāb se mad.hosh ho ga.e mai-ḳhvār

duī miTā ke ham āġhosh ho ga.e mai-ḳhvār

tirā payām thā Duubā huā tabassum meñ

bharī thī rūh-e-latāfat tire takallum meñ

navā-e-haq kī kashish thī tire tarannum meñ

yaqīñ kī sham.a jalā.ī shab-e-tavahhum meñ

diloñ ko haq se ham-āhañg kar diyā tū ne

guloñ ko gūñdh ke yak-rañg kar diyā tū ne

tirī navā ne diyā nuur ādamiyat ko

miTā ke rakh diyā hirs-o-havā kī zulmat ko

diloñ se duur kiyā sīm-o-zar kī raġhbat ko

ki pā liyā thā tire dil ne haq kī daulat ko

hujūm-e-zulmat-e-bātil meñ haq-panāhī kī

faqīr ho ke bhī duniyā meñ bādshāhī kī

tirī nigāh meñ qur.ān-o-dīd kā aalam

tirā ḳhayāl thā rāz-e-hayāt kā mahram

har ek gul pe Tapaktī thī pyaar kī shabnam

ki bas gayā thā nazar meñ bahisht kā mausam

nafas nafas meñ kalī rañg-o-bū kī Dhaltī thī

nasīm thī ki farishtoñ kī saañs chaltī thī

tirī sharāb se baabā farīd the sarshār

tire ḳhulūs se be-ḳhud the sūfīyān-e-kibār

kahāñ kahāñ nahīñ pahuñchī tire qadam kī bahār

tire amal ne sañvāre jahān ke kirdār

tirī nigāh ne sahbā-e-āgahī de dī

bashar ke haath meñ qindīl-e-zindagī de dī

tire payām se aisī kī thī masīhā.ī

tire suḳhan meñ habīb-e-ḳhudā kī rānā.ī

tire kalām meñ gautam kā nūr-e-dānā.ī

tire tarāne meñ murlī kā lahn-e-yaktā.ī

har ek nuur nazar aayā tere paikar meñ

tamām nik.hateñ simTī haiñ ik gul-e-tar meñ

jahāñ jahāñ bhī gayā tū ne āgahī bāñTī

añdherī raat meñ chāhat kī raushnī bāñTī

atā kiyā dil-e-bedār zindagī bāñTī

fasād-o-jañg kī duniyā meñ shāñtī bāñTī

bahār aa.ī khilī pyaar kī kalī har sū

tire nafas se nasīm-e-sahar chalī har sū

razā-e-haq ko najāt-e-bashar kahā tū ne

ta.a.īnāt-e-ḳhudī ko zarar kahā tū ne

vafā-nigar ko haqīqat-nigar kahā tū ne

zuhūr-e-ishq ko sachchī sahar kahā tū ne

jahān-e-ishq meñ kuchh besh-o-kam kā farq na thā

tirī nigāh meñ dair-o-haram kā farq na thā

batāyā tū ne ki irfāñ se āshnā honā

kabhī na āshiq-e-duniyā-e-be-vafā honā

badī se shām-o-sahar jang-āzmā honā

ḳhudā se duur na ai banda-e-ḳhudā honā

nashe meñ daulat-o-zar ke na chuur ho jaanā

qarīb aa.e jo duniyā to duur ho jaanā

jo ruuh ban ke samā jaa.e har rag-o-pai meñ

to phir na shahd meñ lazzat na sāġhar-e-mai meñ

vahī hai saaz ke parde meñ lahn meñ lai meñ

usī kī zaat kī parchhā.iyāñ har ik shai meñ

na mauj hai na sitāroñ kī aab hai koī

tajalliyoñ ke idhar āftāb hai koī

abad kā nuur farāham kiyā sahar ke liye

diyā payām bahāroñ kā dasht-o-dar ke liye

diye jalā diye tārīk rahguzar ke liye

jiyā bashar ke liye jaan dī bashar ke liye

duā ye hai ki rahe ishq hashr tak terā

zamīñ pe aam ho ye dard-e-mushtarak terā

ḳhudā kare ki zamāna sune tirī āvāz

har ik jabīñ ko mayassar ho terā aks-e-niyāz

jahāñ meñ aam ho tere hī pyaar kā andāz

ḳhulūs-e-dil se ho puujā ḳhulūs-e-dil se namāz

tire payām kī barakat se nek ho jaa.eñ

ye imtiyāz miTeñ log ek ho jaa.eñ

tere jamal se ai aaftab-e-nankana

nikhar nikhar gaya husn-e-shuur-e-rindana

kuchh aise rang se chheDa rabab-e-mastana

ki jhumne laga ruhaniyat ka mai-KHana

teri sharab se madhosh ho gae mai-KHwar

dui miTa ke hum aaghosh ho gae mai-KHwar

tera payam tha Duba hua tabassum mein

bhari thi ruh-e-latafat tere takallum mein

nawa-e-haq ki kashish thi tere tarannum mein

yaqin ki shama jalai shab-e-tawahhum mein

dilon ko haq se ham-ahang kar diya tu ne

gulon ko gundh ke yak-rang kar diya tu ne

teri nawa ne diya nur aadamiyat ko

miTa ke rakh diya hirs-o-hawa ki zulmat ko

dilon se dur kiya sim-o-zar ki raghbat ko

ki pa liya tha tere dil ne haq ki daulat ko

hujum-e-zulmat-e-baatil mein haq-panahi ki

faqir ho ke bhi duniya mein baadshahi ki

teri nigah mein quran-o-did ka aalam

tera KHayal tha raaz-e-hayat ka mahram

har ek gul pe Tapakti thi pyar ki shabnam

ki bas gaya tha nazar mein bahisht ka mausam

nafas nafas mein kali rang-o-bu ki Dhalti thi

nasim thi ki farishton ki sans chalti thi

teri sharab se baba farid the sarshaar

tere KHulus se be-KHud the sufiyan-e-kibar

kahan kahan nahin pahunchi tere qadam ki bahaar

tere amal ne sanware jahan ke kirdar

teri nigah ne sahba-e-agahi de di

bashar ke hath mein qindil-e-zindagi de di

tere payam se aisi ki thi masihai

tere suKHan mein habib-e-KHuda ki ranai

tere kalam mein gautam ka nur-e-danai

tere tarane mein murli ka lahn-e-yaktai

har ek nur nazar aaya tere paikar mein

tamam nikhaten simTi hain ek gul-e-tar mein

jahan jahan bhi gaya tu ne aagahi banTi

andheri raat mein chahat ki raushni banTi

ata kiya dil-e-bedar zindagi banTi

fasad-o-jang ki duniya mein shanti banTi

bahaar aai khili pyar ki kali har su

tere nafas se nasim-e-sahar chali har su

raza-e-haq ko najat-e-bashar kaha tu ne

tainat-e-KHudi ko zarar kaha tu ne

wafa-nigar ko haqiqat-nigar kaha tu ne

zuhur-e-ishq ko sachchi sahar kaha tu ne

jahan-e-ishq mein kuchh besh-o-kam ka farq na tha

teri nigah mein dair-o-haram ka farq na tha

bataya tu ne ki irfan se aashna hona

kabhi na aashiq-e-duniya-e-be-wafa hona

badi se sham-o-sahar jang-azma hona

KHuda se dur na ai banda-e-KHuda hona

nashe mein daulat-o-zar ke na chur ho jaana

qarib aae jo duniya to dur ho jaana

jo ruh ban ke sama jae har rag-o-pai mein

to phir na shahd mein lazzat na saghar-e-mai mein

wahi hai saz ke parde mein lahn mein lai mein

usi ki zat ki parchhaiyan har ek shai mein

na mauj hai na sitaron ki aab hai koi

tajalliyon ke idhar aaftab hai koi

abad ka nur faraham kiya sahar ke liye

diya payam bahaaron ka dasht-o-dar ke liye

diye jala diye tarik rahguzar ke liye

jiya bashar ke liye jaan di bashar ke liye

dua ye hai ki rahe ishq hashr tak tera

zamin pe aam ho ye dard-e-mushtarak tera

KHuda kare ki zamana sune teri aawaz

har ek jabin ko mayassar ho tera aks-e-niyaz

jahan mein aam ho tere hi pyar ka andaz

KHulus-e-dil se ho puja KHulus-e-dil se namaz

tere payam ki barakat se nek ho jaen

ye imtiyaz miTen log ek ho jaen