gungi iltija

rabb-ul-izzat

vo zamīn jise tū ne banī aadam ke liye jannat banāyā thā

aur amn ke gahvāre kā naam diyā thā

jahāñ hamārī āzmā.ish ke liye shajar-e-mamnūa ke saath saath

hamārī rubūbiyat ke liye tū ne shajar-e-hayāt bhī ugāyā thā

hamārī vo zamīn paanī havā aur ḳhushkī kī maḳhlūq kā mushtarka ghar thī

is pyārī zamīn par ābād saarī maḳhlūq ek dūsre se raazī thī

aur jis kī saarī maḳhlūq ko bāham raazī dekh kar tū bhī ham se raazī thā

ai rabb-ul-izzat ham ne vo zamīn apne hāthoñ barbād kar ke rakh dī hai

hamārā tujh par koī haq nahīñ ki zid kareñ

lekin tū ne tauba kā darvāza to khulā rakkhā hai

be-shak tauba kī ibtidā e'tirāf se hotī hai

magar is kī intihā hamesha duā se hotī aa.ī hai

mere paas duā ke laa.eq alfāz nahīñ haiñ

lekin tere paas merī gūñgī iltijā sunñe ke liye bahut achchhe kaan haiñ

husn-e-samā.at tujh par ḳhatm hai

is liye ki tū azal se muztaroñ kī suntā aur murda zamīnoñ ko zinda kartā aayā hai

sun ai samī.a sun

ek martaba phir is zamīn par amn ummīd aur masarrat ke pharere lahrā de

ek martaba phir is ke beTe beTiyoñ kā haath pakaḌ

unheñ adhūre-pan se najāt de de

puurā kar de unheñ

vo havas aur be-sabrī kī khaultī daldal meñ

bad-sūrat meñDakoñ kī tarah auñdhe muñh paḌe haiñ

unheñ puure qad se khaḌā kar de

un kī azmat-e-ādam lauTā de

unheñ ek dūsre par e'timād karnā sikhā de

taufīq de unheñ ki terī atā karda quvvat-e-taḳhlīq se

zamīn ko husn aur ma.anī se mālā-māl kar deñ

ehtirām Daal de in ke dil-o-dimāġh meñ is zamīn ke liye

apnī us maañ ke liye

us kī saarī maḳhlūq ke liye

nasl aqīde jins aur saqāfat kā farq in kī vahdat meñ na.e rañg bhare

vo puure kurra-e-arz par phaile hoñ lekin ek dūsre kā haath pakaḌ kar

vo puure kurra-e-arz ko ek aise dastarḳhvāñ kī shakl de deñ

jis par zamīn kā saarā rizq zamīn kī saarī maḳhlūq ke liye aam ho

chhe arab insān hī nahīñ zamīn kī saarī maḳhlūq sairāb-o-shād-kām ho

ai rabb-ul-izzat

tū ne is zamīn kī sūrat meñ jo jannat hameñ dī thī

ham ne use apne liye jahannam banā liyā hai

ye jahannam sirf nifāq aur nafrat hī nahīñ ḳhauf se bhī labrez hai

ek dūsre se ḳhauf apne aap se ḳhauf

aur ḳhauf to mohabbat kī nafī hotā hai

aur saarī mohabbatoñ kī ibtidā aur intihā

hameñ ek martaba phir mohabbat se sarshār kar de

ki mohabbat ke baġhair hameñ na to sachchā amn nasīb hogā aur na sachchī zindagī

ham mohabbat se mahrūm rahe to ḳhvāh to zamīn ko sau martaba bhī jannat banā de

ham hazār martaba use jahannam banā ke rakh deñge

ham ne nafrat nifāq aur ḳhauf ko aazmā kar dekh liyā hai

ai rabb-ul-izzat

hamāre vajūd mohabbat ke liye is tarah taras rahe haiñ

jaise pyāsī zamīn bārish ke liye tarastī hai

hameñ mohabbat nasīb kar de

rabb-ul-izzat

wo zamin jise tu ne bani aadam ke liye jannat banaya tha

aur amn ke gahware ka nam diya tha

jahan hamari aazmaish ke liye shajar-e-mamnua ke sath sath

hamari rububiyat ke liye tu ne shajar-e-hayat bhi ugaya tha

hamari wo zamin pani hawa aur KHushki ki maKHluq ka mushtarka ghar thi

is pyari zamin par aabaad sari maKHluq ek dusre se raazi thi

aur jis ki sari maKHluq ko baham raazi dekh kar tu bhi hum se raazi tha

ai rabb-ul-izzat hum ne wo zamin apne hathon barbaad kar ke rakh di hai

hamara tujh par koi haq nahin ki zid karen

lekin tu ne tauba ka darwaza to khula rakkha hai

be-shak tauba ki ibtida e'tiraf se hoti hai

magar is ki intiha hamesha dua se hoti aai hai

mere pas dua ke laeq alfaz nahin hain

lekin tere pas meri gungi iltija sunne ke liye bahut achchhe kan hain

husn-e-samaat tujh par KHatm hai

is liye ki tu azal se muztaron ki sunta aur murda zaminon ko zinda karta aaya hai

sun ai samia sun

ek martaba phir is zamin par amn ummid aur masarrat ke pharere lahra de

ek martaba phir is ke beTe beTiyon ka hath pakaD

unhen adhure-pan se najat de de

pura kar de unhen

wo hawas aur be-sabri ki khaulti daldal mein

bad-surat meinDakon ki tarah aundhe munh paDe hain

unhen pure qad se khaDa kar de

un ki azmat-e-adam lauTa de

unhen ek dusre par e'timad karna sikha de

taufiq de unhen ki teri ata karda quwwat-e-taKHliq se

zamin ko husn aur mani se mala-mal kar den

ehtiram Dal de in ke dil-o-dimagh mein is zamin ke liye

apni us man ke liye

us ki sari maKHluq ke liye

nasl aqide jins aur saqafat ka farq in ki wahdat mein nae rang bhare

wo pure kurra-e-arz par phaile hon lekin ek dusre ka hath pakaD kar

wo pure kurra-e-arz ko ek aise dastarKHwan ki shakl de den

jis par zamin ka sara rizq zamin ki sari maKHluq ke liye aam ho

chhe arab insan hi nahin zamin ki sari maKHluq sairab-o-shad-kaam ho

ai rabb-ul-izzat

tu ne is zamin ki surat mein jo jannat hamein di thi

hum ne use apne liye jahannam bana liya hai

ye jahannam sirf nifaq aur nafrat hi nahin KHauf se bhi labrez hai

ek dusre se KHauf apne aap se KHauf

aur KHauf to mohabbat ki nafi hota hai

aur sari mohabbaton ki ibtida aur intiha

hamein ek martaba phir mohabbat se sarshaar kar de

ki mohabbat ke baghair hamein na to sachcha amn nasib hoga aur na sachchi zindagi

hum mohabbat se mahrum rahe to KHwah to zamin ko sau martaba bhi jannat bana de

hum hazar martaba use jahannam bana ke rakh denge

hum ne nafrat nifaq aur KHauf ko aazma kar dekh liya hai

ai rabb-ul-izzat

hamare wajud mohabbat ke liye is tarah taras rahe hain

jaise pyasi zamin barish ke liye tarasti hai

hamein mohabbat nasib kar de