hum baghban sare hindostan chaman hai

ham bāġhbān saare hindostāñ chaman hai

bachche haiñ is ke ham sab ye māder-e-vatan hai

hindū hoñ yā musalmāñ īsā.ī hoñ ki sikh hoñ

sab haath paañv is ke hindostāñ badan hai

is kā har ek chappa motī ugal rahā hai

ye sarzamīn saarī firdaus hai adan hai

daulat ubal rahī hai har khet hai ḳhazāna

ye ruuī hai ye chāval ye chaa.e hai ye san hai

har chiiz meñ hai is kī ik shān-e-dilrubā.ī

dariyā pahāḌ jangal har shai meñ bāñkpan hai

phuul is ke ḳhūbsūrat jāñ-baḳhsh in kī nig.hat

champā hai motiyā hai belā hai yāsman hai

phal is ke mīThe-mīThe ḳhush-zā.eqa rasīle

shahd-o-shakar kī goyā ek nahr maujzan hai

phūlī huī vo sarsoñ khetoñ meñ piilī piilī

goyā ki zard chādar oḌhe hue dulhan hai

vo jeTh kā pasīna sāvan kā phir mahīna

sabze kī hai ye kasrat har khet ik chaman hai

hai gā rahī vo koyal aamoñ kī Daalī Daalī

meñh meñ nahā nahā kar vo mast hai magan hai

kyoñ hind ko na chāheñ hubb-e-vatan hai īmāñ

is sarzamīñ pe sadqe sab apnā jān-o-tan hai

hum baghban sare hindostan chaman hai

bachche hain is ke hum sab ye mader-e-watan hai

hindu hon ya musalman isai hon ki sikh hon

sab hath panw is ke hindostan badan hai

is ka har ek chappa moti ugal raha hai

ye sarzamin sari firdaus hai adan hai

daulat ubal rahi hai har khet hai KHazana

ye rui hai ye chawal ye chae hai ye san hai

har chiz mein hai is ki ek shan-e-dilrubai

dariya pahaD jangal har shai mein bankpan hai

phul is ke KHubsurat jaan-baKHsh in ki nighat

champa hai motiya hai bela hai yasman hai

phal is ke miThe-miThe KHush-zaeqa rasile

shahd-o-shakar ki goya ek nahr maujzan hai

phuli hui wo sarson kheton mein pili pili

goya ki zard chadar oDhe hue dulhan hai

wo jeTh ka pasina sawan ka phir mahina

sabze ki hai ye kasrat har khet ek chaman hai

hai ga rahi wo koyal aamon ki Dali Dali

meinh mein naha naha kar wo mast hai magan hai

kyon hind ko na chahen hubb-e-watan hai iman

is sarzamin pe sadqe sab apna jaan-o-tan hai