ہم باغبان سارے ہندوستاں چمن ہے

ہم باغبان سارے ہندوستاں چمن ہے

بچے ہیں اس کے ہم سب یہ مادر وطن ہے

ہندو ہوں یا مسلماں عیسائی ہوں کہ سکھ ہوں

سب ہاتھ پاؤں اس کے ہندوستاں بدن ہے

اس کا ہر ایک چپہ موتی اگل رہا ہے

یہ سرزمین ساری فردوس ہے عدن ہے

دولت ابل رہی ہے ہر کھیت ہے خزانہ

یہ روئی ہے یہ چاول یہ چائے ہے یہ سن ہے

ہر چیز میں ہے اس کی اک شان دل ربائی

دریا پہاڑ جنگل ہر شے میں بانکپن ہے

پھول اس کے خوب صورت جاں بخش ان کی نگہت

چمپا ہے موتیا ہے بیلا ہے یاسمن ہے

پھل اس کے میٹھے میٹھے خوش ذائقہ رسیلے

شہد و شکر کی گویا ایک نہر موجزن ہے

پھولی ہوئی وہ سرسوں کھیتوں میں پیلی پیلی

گویا کہ زرد چادر اوڑھے ہوئے دلہن ہے

وہ جیٹھ کا پسینہ ساون کا پھر مہینہ

سبزے کی ہے یہ کثرت ہر کھیت اک چمن ہے

ہے گا رہی وہ کوئل آموں کی ڈالی ڈالی

مینہ میں نہا نہا کر وہ مست ہے مگن ہے

کیوں ہند کو نہ چاہیں حب وطن ہے ایماں

اس سرزمیں پہ صدقے سب اپنا جان و تن ہے