hans rahi hai chandni

fazā.eñ tilmilā uThīñ jo maiñ ne gungunā diyā

hayāt rasmasā ga.ī jo maiñ ne muskurā diyā

fanā baqā ke darmiyāñ

khīñchī huī hai jo lakīr

hayāt-o-maut ke sire pe nāchte rahe haiñ ham

idhar to ishq hai udaas

udhar hai husn muzmahil

idhar piyāla tishna-kām

udhar shabāb be-qarār

na haath maiñ baḌhā sakā na tum uThā sake qadam

fazā.eñ tilmilā uThīñ

nadī kī mauj mauj meñ charāġh se lapak uThe

fanā baqā ke darmiyāñ

sitāroñ kī saheliyāñ

siñdūr le ke thaal meñ

sañvārne ko aa ga.iiñ

urūs-e-mah ke pech-o-ḳham

na haath maiñ baḌhā sakā na tum baḌhā sake qadam

sañvar chukā hai husn bhī

bikhar rahī hai ġhunchagī

khaḌe hue haiñ kārvāñ

fanā baqā ke darmiyāñ

khīñchī huī lakīr mil ke aao ham miTā na deñ

hadeñ jo mustaqil sī haiñ vo raah se haTā na deñ

banā.eñ ik hayāt-e-nau nashāt-o-be-ḳhudī meñ ham

phaTe phaTe se bādaloñ meñ

hañs rahī hai chāñdnī

fazaen tilmila uThin jo main ne gunguna diya

hayat rasmasa gai jo main ne muskura diya

fana baqa ke darmiyan

khinchi hui hai jo lakir

hayat-o-maut ke sire pe nachte rahe hain hum

idhar to ishq hai udas

udhar hai husn muzmahil

idhar piyala tishna-kaam

udhar shabab be-qarar

na hath main baDha saka na tum uTha sake qadam

fazaen tilmila uThin

nadi ki mauj mauj mein charagh se lapak uThe

fana baqa ke darmiyan

sitaron ki saheliyan

sindur le ke thaal mein

sanwarne ko aa gain

urus-e-mah ke pech-o-KHam

na hath main baDha saka na tum baDha sake qadam

sanwar chuka hai husn bhi

bikhar rahi hai ghunchagi

khaDe hue hain karwan

fana baqa ke darmiyan

khinchi hui lakir mil ke aao hum miTa na den

haden jo mustaqil si hain wo rah se haTa na den

banaen ek hayat-e-nau nashat-o-be-KHudi mein hum

phaTe phaTe se baadalon mein

hans rahi hai chandni