haq aur ghar

kabhī in chiḌiyoñ se bhī pūchhnā hai

tumhārā ghar kahāñ hai

ye ghar hai kyā ye ghar hai kab

huā kartā hai kis kā ye

retire ho chukā huuñ maiñ

jo kahte haiñ vo college thā

ġhalat haiñ vo

hai kab pahchān rishtoñ kī

hai kab pahchān jag.hoñ kī

vo merā ghar thā merī jaan

vahī har roz kā jaanā

qatāreñ kamroñ kī hotīñ

baḌe kuchh aur kuchh chhoTe

magar vo saare apne the

maiñ sañg bachchoñ ke rahtā thā

bahut kuchh sīkhtā un se

kabhī un ko sikhātā bhī

vo merā ghar thā merā haq thā us par

ziyāda gar nahīñ to kam bhī kab thā

abhī bhī saare kamre haiñ

abhī bhī saare bachche haiñ

magar vo haq nahīñ hai

vo bas ab ghar nahīñ hai

kahāñ jā.ūñ maiñ unmeñ ab

qatāroñ meñ haiñ kamre jaise the vo

clāssoñ meñ haiñ bachche jaise the vo

huuñ maiñ bas ghar se bāhar

sunā.ī degī gar jā.ūñgā ḳhud āvāz apnī

vahāñ bachche nahīñ hoñge haañ bas āvāzeñ lauTeñgī

maiñ Dar jā.ūñgā vāpas ā.ūñgā vo ghar nahīñ hai

vahāñ ab merā koī haq nahīñ hai

baras biite haiñ tab ye jaan paaya dard kyā hai

hamārī beTiyāñ kyuuñ yuuñ taḌaptī haiñ

jab un kī Dolī uThtī hai

unheñ mahsūs ho ye ab nahīñ ghar

nahīñ hai haq koī in kā ab us par

ye haq hai asl jo hai ghar kā mālik

agar haq hai to phir ghar hai

nahīñ hai to paTaḳh lo paañv kitne

nahīñ vo ghar tumhārā ab

vo college ho yā mā.ikā!

kahāvat hai makīñ se hī makāñ hai

ġhalat maiñ kyuuñ kahūñ hogā

magar mere liye aisā nahīñ hai

hamesha se makāñ se hī makīñ jaanā

hoñ ye hālāt apne ḳhud

yā phir hoñ beTiyoñ ke vo

yahī kaḌvā vo sach hai jo nigalnā hai

mujhe bhī beTiyoñ ko bhī

mujhe apnī hī kaḌvāhaT se hai

do chaar honā ab

sadī biitī hai aadhī jab

chhinā hai ek ghar merā

milegā dūsrā ab kab

ikaTThā hī mile shāyad

dobāra phir retire huuñ

dobāra ghar kā ho afsos

yā phir ghar na hone kā

kabhi in chiDiyon se bhi puchhna hai

tumhaara ghar kahan hai

ye ghar hai kya ye ghar hai kab

hua karta hai kis ka ye

retire ho chuka hun main

jo kahte hain wo college tha

ghalat hain wo

hai kab pahchan rishton ki

hai kab pahchan jaghon ki

wo mera ghar tha meri jaan

wahi har roz ka jaana

qataren kamron ki hotin

baDe kuchh aur kuchh chhoTe

magar wo sare apne the

main sang bachchon ke rahta tha

bahut kuchh sikhta un se

kabhi un ko sikhata bhi

wo mera ghar tha mera haq tha us par

ziyaada gar nahin to kam bhi kab tha

abhi bhi sare kamre hain

abhi bhi sare bachche hain

magar wo haq nahin hai

wo bas ab ghar nahin hai

kahan jaun main unmen ab

qataron mein hain kamre jaise the wo

classon mein hain bachche jaise the wo

hun main bas ghar se bahar

sunai degi gar jaunga KHud aawaz apni

wahan bachche nahin honge han bas aawazen lauTengi

main Dar jaunga wapas aaunga wo ghar nahin hai

wahan ab mera koi haq nahin hai

baras bite hain tab ye jaan paya dard kya hai

hamari beTiyan kyun yun taDapti hain

jab un ki Doli uThti hai

unhen mahsus ho ye ab nahin ghar

nahin hai haq koi in ka ab us par

ye haq hai asl jo hai ghar ka malik

agar haq hai to phir ghar hai

nahin hai to paTaKH lo panw kitne

nahin wo ghar tumhaara ab

wo college ho ya maika!

kahawat hai makin se hi makan hai

ghalat main kyun kahun hoga

magar mere liye aisa nahin hai

hamesha se makan se hi makin jaana

hon ye haalat apne KHud

ya phir hon beTiyon ke wo

yahi kaDwa wo sach hai jo nigalna hai

mujhe bhi beTiyon ko bhi

mujhe apni hi kaDwahaT se hai

do chaar hona ab

sadi biti hai aadhi jab

chhina hai ek ghar mera

milega dusra ab kab

ikaTTha hi mile shayad

dobara phir retire hun

dobara ghar ka ho afsos

ya phir ghar na hone ka