har baras main

har baras maiñ pichhle barsoñ meñ bhaTak jaatā huuñ

maazī meñ tere hāthoñ meñ kāġhaz kī safedī huuñ

maiñ kin lamhāt kī guzrī savāneh huuñ ki terā saañs

mere mausamoñ meñ dhuñd kī chādar banā hai

uñgliyoñ kī shāḳh us tahrīr ke alfāz par

paanī kī narmāhaT se hiltī hai

mirī āñkheñ ishāroñ ke kināroñ par khaḌī

āvāz kī tanhā.ī meñ

hoñToñ kī lambī sīḌhiyoñ par dam-ba-ḳhud

palkoñ kī jumbish meñ

kuñ.eñ kī sabz kaa.ī kī tarah zinda haiñ

aur vīrān

kaise qāfile jismoñ ke sahrāoñ kī jānib chal paḌe

ḳhvāhish ke gūñge haath meñ

qurbat kī mailī dhajjiyāñ haiñ

har baras guzre hue barsoñ kī dīvāroñ ke raḳhnoñ meñ

mire sab ḳhāl-o-ḳhat bharte ga.e

gārāne haiñ

ab mirī sāñsoñ meñ īñToñ kī qatāreñ haiñ

mire māthe pe ḳhud-rav ghaas kā jañgal basā hai

aur merī nīndeñ syāhī kī jaḌoñ meñ duur gahrī haiñ

mire sapne kisī be-chehra aurat kī ziyārat ke liye

muddat huī ghar se ga.e haiñ

har baras maiñ apne aadhe jism kī taz.īn kartā huuñ

libādoñ meñ lipaT kar

apne hone kī gavāhī ke kināroñ tak pahuñchtā huuñ

har baras main pichhle barson mein bhaTak jata hun

mazi mein tere hathon mein kaghaz ki safedi hun

main kin lamhat ki guzri sawaneh hun ki tera sans

mere mausamon mein dhund ki chadar bana hai

ungliyon ki shaKH us tahrir ke alfaz par

pani ki narmahaT se hilti hai

meri aankhen ishaaron ke kinaron par khaDi

aawaz ki tanhai mein

honTon ki lambi siDhiyon par dam-ba-KHud

palkon ki jumbish mein

kunen ki sabz kai ki tarah zinda hain

aur viran

kaise qafile jismon ke sahraon ki jaanib chal paDe

KHwahish ke gunge hath mein

qurbat ki maili dhajjiyan hain

har baras guzre hue barson ki diwaron ke raKHnon mein

mere sab KHal-o-KHat bharte gae

garane hain

ab meri sanson mein inTon ki qataren hain

mere mathe pe KHud-raw ghas ka jangal basa hai

aur meri ninden syahi ki jaDon mein dur gahri hain

mere sapne kisi be-chehra aurat ki ziyarat ke liye

muddat hui ghar se gae hain

har baras main apne aadhe jism ki tazin karta hun

libaadon mein lipaT kar

apne hone ki gawahi ke kinaron tak pahunchta hun