hasin-tar

kal ek tū hogī aur ik maiñ

koī raqīb-e-rafīq-sūrat

koī rafīq-e-raqīb-sāmāñ

mire tire darmiyāñ na hogā

hamārī umr-e-ravāñ kī shabnam

tirī siyah kākuloñ kī rātoñ

meñ taar chāñdī ke gūñdh degī

tire hasīñ ārizoñ ke rañgīñ

gulāb bele ke phuul hoñge

shafaq kā har rañg ġharq hogā

latīf o pur-kaif chāñdnī meñ

tirī kitāb-e-ruḳh-e-javāñ par

ki jo ġhazal kī kitāb hai ab

zamāna likkhegā ik kahānī

aur an-ginat jhurriyoñ ke andar

mirī mohabbat ke saare bose

hazār lab ban ke hañs paḌeñge

ham apnī biitī huī shaboñ kī

salonī parchhā.iyoñ ko le kar

ham apne ahd-e-tarab kī shaam o

sahar kī rānā.iyoñ ko le kar

purānī yādoñ ke jism-e-uryāñ

ke vāste pairahan buneñge

phir ek tū hogī aur ik maiñ

koī raqīb-e-rafīq-sūrat

ko rafīq-e-raqīb-sāmāñ

mire tire darmiyāñ na hogā

havas kī nazroñ ko tere ruḳh par

jamāl-e-nau kā gumāñ na hogā

faqat mirī husn-e-āzmūda

nazar ye tujh ko batā sakegī

ki terī piirī kā husn tere

shabāb se bhī hasīn-tar hai

kal ek tu hogi aur ek main

koi raqib-e-rafiq-surat

koi rafiq-e-raqib-saman

mere tere darmiyan na hoga

hamari umr-e-rawan ki shabnam

teri siyah kakulon ki raaton

mein tar chandi ke gundh degi

tere hasin aarizon ke rangin

gulab bele ke phul honge

shafaq ka har rang gharq hoga

latif o pur-kaif chandni mein

teri kitab-e-ruKH-e-jawan par

ki jo ghazal ki kitab hai ab

zamana likkhega ek kahani

aur an-ginat jhurriyon ke andar

meri mohabbat ke sare bose

hazar lab ban ke hans paDenge

hum apni biti hui shabon ki

saloni parchhaiyon ko le kar

hum apne ahd-e-tarab ki sham o

sahar ki ranaiyon ko le kar

purani yaadon ke jism-e-uryan

ke waste pairahan bunenge

phir ek tu hogi aur ek main

koi raqib-e-rafiq-surat

ko rafiq-e-raqib-saman

mere tere darmiyan na hoga

hawas ki nazron ko tere ruKH par

jamal-e-nau ka guman na hoga

faqat meri husn-e-azmuda

nazar ye tujh ko bata sakegi

ki teri piri ka husn tere

shabab se bhi hasin-tar hai