haweli maut ki dahliz par

havelī maut kī dahlīz par kab se khaḌī hai

chāñd ne bujh kar

sitāroñ ne udāsī oḌh kar

phūloñ ne ḳhushbū kā libāda pheñk kar

māhaul pas-az-marg kā tayyār kar Daalā hai

bas ik āḳhirī hichkī ke sab haiñ muntazir

saare a.izza-o-aqārib nauha-ḳhvānī ke liye

tayyār baiThe haiñ

havelī maut kī dahlīz par kab se khaḌī hai

us ke marne meñ agar kuchh der baaqī hai

to chal kar dūsre kuchh kaam kar Dāleñ

sadī kā dūsrā ashra

na.e āġhāz ke pul par khaḌā ho kar

samundar kī biphartī mauj ko lalkārtā hai

vaqt ke ġhavvās

sīpoñ meñ guhar khagāñte haiñ

ibn-e-ādam ke qabīle

rūh-e-mashriq kī purānī ghāTiyoñ se

ik ik kar ke nikalte haiñ

buḳhārā o samarqand uzbekistan o hirat

sab pe chhā.ī hai añdherī saḳht raat

lucknow aur akbarabad apnī shaukat kho rahe haiñ

marhabā shām-e-ġharībāñ

ab to chal kar dūsre kuchh kaam kar Dāleñ

havelī maut kī dahlīz par kab se khaḌī hai

haweli maut ki dahliz par kab se khaDi hai

chand ne bujh kar

sitaron ne udasi oDh kar

phulon ne KHushbu ka libaada phenk kar

mahaul pas-az-marg ka tayyar kar Dala hai

bas ek aaKHiri hichki ke sab hain muntazir

sare aizza-o-aqarib nauha-KHwani ke liye

tayyar baiThe hain

haweli maut ki dahliz par kab se khaDi hai

us ke marne mein agar kuchh der baqi hai

to chal kar dusre kuchh kaam kar Dalen

sadi ka dusra ashra

nae aaghaz ke pul par khaDa ho kar

samundar ki bipharti mauj ko lalkarta hai

waqt ke ghawwas

sipon mein guhar khagante hain

ibn-e-adam ke qabile

ruh-e-mashriq ki purani ghaTiyon se

ek ek kar ke nikalte hain

buKHara o samarqand uzbekistan o hirat

sab pe chhai hai andheri saKHt raat

lucknow aur akbarabad apni shaukat kho rahe hain

marhaba sham-e-ghariban

ab to chal kar dusre kuchh kaam kar Dalen

haweli maut ki dahliz par kab se khaDi hai