hijr

aaj tū paas nahīñ hai to khulā hai mujh par

Daar se kuuñj bichhaḌ jaa.e to kyoñ martī hai

mausam-e-dard kā āñgan meñ utarnā kyā hai

shāḳh se Tuut ke pattoñ kā bikharnā kyā hai

chāñd kyoñ raat ke pahlū meñ burā lagtā hai

sub.h ke saath pe itrātī huī bād-e-nasīm

ek bebāk hasīna sī burī lagtī hai

lafz kyoñ apne matālib se mukar jaate haiñ

likhnā chāheñ bhī to tanhā.ī likhī jaatī nahīñ

karnā chāheñ bhī to ye dard bayāñ hotā nahīñ

raat hote hī charāġhoñ ko bujhā denā kyoñ

qaid-e-furqat ke asīroñ ko bhalā lagtā hai

hijr kā lambā safar kaaTe se kyoñ kaTtā nahīñ

paañv kaT jaate haiñ par raat kā thar kaTtā nahīñ

aaj tū paas nahīñ hai to khulā hai mujh pe

Daar se kuuñj bichhaḌ jaa.e to kyoñ martī hai

aaj tu pas nahin hai to khula hai mujh par

Dar se kunj bichhaD jae to kyon marti hai

mausam-e-dard ka aangan mein utarna kya hai

shaKH se Tut ke patton ka bikharna kya hai

chand kyon raat ke pahlu mein bura lagta hai

subh ke sath pe itraati hui baad-e-nasim

ek bebak hasina si buri lagti hai

lafz kyon apne matalib se mukar jate hain

likhna chahen bhi to tanhai likhi jati nahin

karna chahen bhi to ye dard bayan hota nahin

raat hote hi charaghon ko bujha dena kyon

qaid-e-furqat ke asiron ko bhala lagta hai

hijr ka lamba safar kaTe se kyon kaTta nahin

panw kaT jate hain par raat ka thar kaTta nahin

aaj tu pas nahin hai to khula hai mujh pe

Dar se kunj bichhaD jae to kyon marti hai