ہجر

آج تو پاس نہیں ہے تو کھلا ہے مجھ پر

ڈار سے کونج بچھڑ جائے تو کیوں مرتی ہے

موسم درد کا آنگن میں اترنا کیا ہے

شاخ سے ٹوٹ کے پتوں کا بکھرنا کیا ہے

چاند کیوں رات کے پہلو میں برا لگتا ہے

صبح کے ساتھ پہ اتراتی ہوئی باد نسیم

ایک بے باک حسینہ سی بری لگتی ہے

لفظ کیوں اپنے مطالب سے مکر جاتے ہیں

لکھنا چاہیں بھی تو تنہائی لکھی جاتی نہیں

کرنا چاہیں بھی تو یہ درد بیاں ہوتا نہیں

رات ہوتے ہی چراغوں کو بجھا دینا کیوں

قید فرقت کے اسیروں کو بھلا لگتا ہے

ہجر کا لمبا سفر کاٹے سے کیوں کٹتا نہیں

پاؤں کٹ جاتے ہیں پر رات کا تھر کٹتا نہیں

آج تو پاس نہیں ہے تو کھلا ہے مجھ پہ

ڈار سے کونج بچھڑ جائے تو کیوں مرتی ہے