hijr ka visal

yuuñ to sab ke apne apne ḳhvāb haiñ

jaise apnā apnā kafan

aur kaun kis ke kafan kī utran pahan saktā hai

lekin vo jo ik duuje kī qabr meñ so jaane kī

ḳhvāhish meñ dafn hue

apne apne akele-pan kī uḌtī miTTī meñ

kyā un ke bhī apne apne ḳhvāb the

aao ham ik-dūje kī ḳhvāboñ kī tavīl ghūmtī bhūl-bhulayyoñ vaalī ġhulām gardishoñ meñ kho jaa.eñ

aur ek dūsre kī chaap kī sadā-e-bāzgasht ban jaa.eñ

aao ham ek hī fareb ke pīchhe bhāgne kī koshish kareñ

aur azal aur abad kī tanābeñ khīñch kar

ek saath

frēze frame ho jaa.eñ

phir bhī sach hai

ki sab ke apne apne ḳhvāb haiñ

adhūre adhūre

halkī halkī aañch meñ sulagte

raakh hote

aur patjhaḌ meñ uḌte

aur aañsū kab tak patjhaḌ sañvār sakte haiñ

jab tak aañsū dil meñ girte rahte haiñ

dil un ko sukhī dinoñ kī aas dilā kar

thapak thapak kar sulātā rahtā hai

aur saarī tapish jazb kar letā hai apnī dhaḌaktī ḳhāmosh rātoñ meñ

lekin jab koī ziddī aañsū

apne aap se ruuTh ke

gir paḌtā hai

tab to dil bhī nahīñ māntā koī phuslāva

bas aañsū bahne lagte haiñ chup-chāp

patjhaḌ ke pattoñ kī tarah

thake thake qadmoñ kī mānind

pyāre kyā koī aisā bhī din hogā

jab ye din aa jā.egā

aur tab

dil kitne sogvār ho jā.eñge

aur hamāre TuuTe phūTe chehre ek dūsre ko

kaisī khoī khoī nazroñ se dekheñge

sākit ho jā.eñge abad ke chaukhaTe meñ

aur pas-e-manzar meñ saxophone kī siskiyāñ ubhareñgī

aur ek shikasta ḳhvāb kī melody meñ Dhal jā.eñgī

phir bhī sach hai

ki sab ke apne apne ḳhvāb hote haiñ

lekin vo bhī to sach hai pyāre

yun to sab ke apne apne KHwab hain

jaise apna apna kafan

aur kaun kis ke kafan ki utran pahan sakta hai

lekin wo jo ek duje ki qabr mein so jaane ki

KHwahish mein dafn hue

apne apne akele-pan ki uDti miTTi mein

kya un ke bhi apne apne KHwab the

aao hum ik-duje ki KHwabon ki tawil ghumti bhul-bhulayyon wali ghulam gardishon mein kho jaen

aur ek dusre ki chap ki sada-e-bazgasht ban jaen

aao hum ek hi fareb ke pichhe bhagne ki koshish karen

aur azal aur abad ki tanaben khinch kar

ek sath

freeze frame ho jaen

phir bhi sach hai

ki sab ke apne apne KHwab hain

adhure adhure

halki halki aanch mein sulagte

rakh hote

aur patjhaD mein uDte

aur aansu kab tak patjhaD sanwar sakte hain

jab tak aansu dil mein girte rahte hain

dil un ko sukhi dinon ki aas dila kar

thapak thapak kar sulata rahta hai

aur sari tapish jazb kar leta hai apni dhaDakti KHamosh raaton mein

lekin jab koi ziddi aansu

apne aap se ruTh ke

gir paDta hai

tab to dil bhi nahin manta koi phuslawa

bas aansu bahne lagte hain chup-chap

patjhaD ke patton ki tarah

thake thake qadmon ki manind

pyare kya koi aisa bhi din hoga

jab ye din aa jaega

aur tab

dil kitne sogwar ho jaenge

aur hamare TuTe phuTe chehre ek dusre ko

kaisi khoi khoi nazron se dekhenge

sakit ho jaenge abad ke chaukhaTe mein

aur pas-e-manzar mein saxophone ki siskiyan ubharengi

aur ek shikasta KHwab ki melody mein Dhal jaengi

phir bhi sach hai

ki sab ke apne apne KHwab hote hain

lekin wo bhi to sach hai pyare