hijrat

vo āġhosh jis meñ pale

aur pal kar javāñ ham hue haiñ

use chhoḌne kī tadābīr karne meñ masrūf aise hue haiñ

ki zindāñ se qaidī rihā.ī kī rāhoñ kī

ta.amīr karne meñ mashġhūl hote haiñ jaise

vo āġhosh jis meñ javāñ ham hue haiñ

use chhoḌ kar duur jaane ke ehsās se

jo ḳhushī mil rahī hai

kisī bhī tarah is se kamtar nahīñ hai

jo zindāñ se bāhar nikalne meñ mahsūs hotī hai zindāniyoñ ko

ḳhush kā ye ehsās

aisā nahīñ ki faqat ek ham tak hī mahdūd ho

ye ḳhushī ghar ke dīvār-o-dar meñ bhī ghar kar ga.ī hai

maañ bahan baap bhaa.ī bhī gardan uThā.e hue

apne ham-sāyoñ se kahte phirte nazar aa rahe haiñ

ki merā qamar bhī arab jā rahā hai

sharīk-e-safar kī ragoñ meñ bhī ḳhushiyāñ uchhalne lagī haiñ

vo rātoñ kī sab lazzateñ bhuul kar

jaane vaale kī taiyāriyoñ meñ

baḌe chaav se munhamik ho ga.ī hai

ajab jāñ-fizā hai ye hijrat kā manzar

magar ye rivāyat hai

makke se yasrib ko jaate hue

mustafā aur saare sahābī bahut ro rahe the

vatan kī mohabbat inheñ roktī thī

judā.ī jigar meñ tabar bhauñktī thī

vo hijrat kā manzar baḌā jāñ-gusil thā

magar aaj hijrat kā manzar badal sā gayā hai

ye manzar to sach-much baḌā jāñ-fizā hai

magar aisā kyuuñ huā hai

yahāñ to mazālim kī vo saḳhtiyāñ bhī nahīñ haiñ

wo aaghosh jis mein pale

aur pal kar jawan hum hue hain

use chhoDne ki tadabir karne mein masruf aise hue hain

ki zindan se qaidi rihai ki rahon ki

tamir karne mein mashghul hote hain jaise

wo aaghosh jis mein jawan hum hue hain

use chhoD kar dur jaane ke ehsas se

jo KHushi mil rahi hai

kisi bhi tarah is se kamtar nahin hai

jo zindan se bahar nikalne mein mahsus hoti hai zindaniyon ko

KHush ka ye ehsas

aisa nahin ki faqat ek hum tak hi mahdud ho

ye KHushi ghar ke diwar-o-dar mein bhi ghar kar gai hai

man bahan bap bhai bhi gardan uThae hue

apne ham-sayon se kahte phirte nazar aa rahe hain

ki mera qamar bhi arab ja raha hai

sharik-e-safar ki ragon mein bhi KHushiyan uchhalne lagi hain

wo raaton ki sab lazzaten bhul kar

jaane wale ki taiyariyon mein

baDe chaw se munhamik ho gai hai

ajab jaan-fiza hai ye hijrat ka manzar

magar ye riwayat hai

makke se yasrib ko jate hue

mustafa aur sare sahabi bahut ro rahe the

watan ki mohabbat inhen rokti thi

judai jigar mein tabar bhaunkti thi

wo hijrat ka manzar baDa jaan-gusil tha

magar aaj hijrat ka manzar badal sa gaya hai

ye manzar to sach-much baDa jaan-fiza hai

magar aisa kyun hua hai

yahan to mazalim ki wo saKHtiyan bhi nahin hain