hikayat-e-dauran

dublā patlā nāzuk 'daurāñ'

shīsha jaisā nāzuk 'daurāñ'

ġham kī kaalī raat kā maarā

apne hī jazbāt kā maarā

āThoñ pahar yuuñ khoyā khoyā

jaise gahrī soch meñ Duubā

kam hañsnā aadat meñ dāḳhil

ḳhāmoshī fitrat meñ dāḳhil

sham.a kī sūrat bazm meñ jalnā

gaah bhaḌaknā gaah pighalnā

māthe par har vaqt shikan sī

chehra par āzurda thakan sī

chehre se mahrūmī zāhir

māsūmī mazlūmī zāhir

āñkheñ har dam umDī umDī

palkeñ har dam bhīgī bhīgī

karb āñkhoñ meñ dard āñkhoñ meñ

rāh-e-vafā kī gard āñkhoñ meñ

sahmā sahmā shām-e-balā se

rūThā rūThā apne ḳhudā se

aql-o-ḳhirad se jī ko churā.e

pāgal-pan se baaz na aa.e

jaane dil meñ kis kī lagan hai

ruuh meñ kis kāñTe kī chubhan hai

ye hai apnā 'daurāñ' yaaro

uljhā suljhā 'daurāñ' yaaro

lekin yaaro yahī musāfir

rāh-e-vafā kā dukhī musāfir

shānoñ par ik bojh ko laade

rāh-e-talab meñ aage aage

dil meñ ik mazbūt irāda

nazroñ meñ ik raushan jaada

ġham kī lambī raat pe bhārī

zulm kā aur zulmat kā shikārī

insānī tahzīb kā qaa.il

duniyā kī ta.amīr pe maa.il

sa.i-e-paiham us kī tamannā

jagmag jagmag us kā rasta

us kī saarī fikr-e-pareshāñ

insānī tanzīm kī ḳhvāhāñ

nazmeñ us kī jān-e-maqāsid

rūh-e-tamaddun shān-e-maqāsid

sub.h pe shaidā shaam pe āshiq

apne vatan ke naam pe āshiq

bāteñ raib-o-riyā se ḳhālī

har naqsh-e-kirdār misālī

pyaar insāñ kā dil meñ chhupā.e

dard-e-jahāñ siine meñ basā.e

'daurāñ' hai yā rūh-e-'daurāñ'

giryāñ giryāñ ḳhandāñ ḳhandāñ

is kī duniyā apnī duniyā

is duniyā meñ saarī duniyā

dubla patla nazuk 'dauran'

shisha jaisa nazuk 'dauran'

gham ki kali raat ka mara

apne hi jazbaat ka mara

aaThon pahar yun khoya khoya

jaise gahri soch mein Duba

kam hansna aadat mein daKHil

KHamoshi fitrat mein daKHil

shama ki surat bazm mein jalna

gah bhaDakna gah pighalna

mathe par har waqt shikan si

chehra par aazurda thakan si

chehre se mahrumi zahir

masumi mazlumi zahir

aankhen har dam umDi umDi

palken har dam bhigi bhigi

karb aankhon mein dard aankhon mein

rah-e-wafa ki gard aankhon mein

sahma sahma sham-e-bala se

ruTha ruTha apne KHuda se

aql-o-KHirad se ji ko churae

pagal-pan se baz na aae

jaane dil mein kis ki lagan hai

ruh mein kis kanTe ki chubhan hai

ye hai apna 'dauran' yaro

uljha suljha 'dauran' yaro

lekin yaro yahi musafir

rah-e-wafa ka dukhi musafir

shanon par ek bojh ko lade

rah-e-talab mein aage aage

dil mein ek mazbut irada

nazron mein ek raushan jada

gham ki lambi raat pe bhaari

zulm ka aur zulmat ka shikari

insani tahzib ka qail

duniya ki tamir pe mail

sai-e-paiham us ki tamanna

jagmag jagmag us ka rasta

us ki sari fikr-e-pareshan

insani tanzim ki KHwahan

nazmen us ki jaan-e-maqasid

ruh-e-tamaddun shan-e-maqasid

subh pe shaida sham pe aashiq

apne watan ke nam pe aashiq

baaten raib-o-riya se KHali

har naqsh-e-kirdar misali

pyar insan ka dil mein chhupae

dard-e-jahan sine mein basae

'dauran' hai ya ruh-e-'dauran'

giryan giryan KHandan KHandan

is ki duniya apni duniya

is duniya mein sari duniya