hindostan

ye bazm-e-sho’la-kārī ye harīm-e-ātish-afshānī

ye qashqe ye ‘abā.eñ ye girānī ye girāñ-jānī

yahāñ ik silsila hai nafratoñ kī dāstānoñ kā

raqābat kī ḳhalījoñ kā 'adāvat kī chaTānoñ kā

yahāñ ḳhūnī tarāne raqs karte haiñ fazāoñ meñ

chamakte haiñ yahāñ taḳhrīb ke parcham havāoñ meñ

yahāñ har ek siine meñ riyā kī aag jaltī hai

yahāñ lailā-e-hastī muztar-o-afsurda-sāmāñ hai

ye but-ḳhāne nahīñ qabreñ haiñ ‘irfān-o-haqīqat kī

yahāñ ḳhūñ-rang hai poshāk salmā-e-sharī’at kī

lagā kar vahm kā ġhāza yahāñ maz.hab sañvartā hai

yahāñ shaiḳh-e-haram qur.ān kā nīlām kartā hai

sadā nāqūs kī ik fitna-e-bedār hotī hai

yahāñ bāñg-e-azāñ mirrīḳh kī phunkār hotī hai

asar hai in kī rūhoñ par ḳhirad kī chīra-dastī kā

dhuāñ phailā huā hai chār-sū firqa-parastī kā

yahāñ āsūdgī ik lafz-e-be-mafhūm hai goyā

maqām-e-zindagī se zindagī mahrūm hai goyā

yahāñ shabnam ke qatre maqbare bante haiñ phūloñ ke

tasarruf haiñ yahāñ ā.īna-ḳhānoñ meñ bagūloñ ke

yahāñ insān insāñ kā lahū pī kar nikhartā hai

siyāhī aur baḌh jaatī hai jab sūraj ubhartā hai

mire zulmat-kade par bārish-e-anvār kab hogī

ḳhudā jaane ki ab insāniyat bedār kab hogī

ye bazm-e-sho’la-kari ye harim-e-atish-afshani

ye qashqe ye ‘abaen ye girani ye giran-jaani

yahan ek silsila hai nafraton ki dastanon ka

raqabat ki KHalijon ka 'adawat ki chaTanon ka

yahan KHuni tarane raqs karte hain fazaon mein

chamakte hain yahan taKHrib ke parcham hawaon mein

yahan har ek sine mein riya ki aag jalti hai

yahan laila-e-hasti muztar-o-afsurda-saman hai

ye but-KHane nahin qabren hain ‘irfan-o-haqiqat ki

yahan KHun-rang hai poshak salma-e-shari’at ki

laga kar wahm ka ghaza yahan mazhab sanwarta hai

yahan shaiKH-e-haram quran ka nilam karta hai

sada naqus ki ek fitna-e-bedar hoti hai

yahan bang-e-azan mirriKH ki phunkar hoti hai

asar hai in ki ruhon par KHirad ki chira-dasti ka

dhuan phaila hua hai chaar-su firqa-parasti ka

yahan aasudgi ek lafz-e-be-mafhum hai goya

maqam-e-zindagi se zindagi mahrum hai goya

yahan shabnam ke qatre maqbare bante hain phulon ke

tasarruf hain yahan aaina-KHanon mein bagulon ke

yahan insan insan ka lahu pi kar nikharta hai

siyahi aur baDh jati hai jab suraj ubharta hai

mere zulmat-kade par barish-e-anwar kab hogi

KHuda jaane ki ab insaniyat bedar kab hogi