husn-e-qudrat

husn hai maujūd har jā chashm-e-bīnā chāhiye

dīda-e-dil khol kar haañ us ko dekhā chāhiye

us kā jalva hai ayaañ gul-hā-e-rangā-rang se

sabze meñ shāḳhoñ meñ ghar us ne kiyā sau Dhang se

jāguzīñ hai raat din ye bahr-o-bar ke des meñ

shahr meñ aatā hai ye la.al-o-gohar ke bhes meñ

husn-e-qudrat munhasir kuchh chhoTī chīzoñ par nahīñ

balki ye jalva-numā hai har jahāñ meñ har kahīñ

koh-o-rāġh-o-abr-o-bād-o-mahr-o-mah jinn-o-bashar

nūr-e-husn-e-haq se haiñ ye sab munavvar sar-basar

hai jahāñ saarā munavvar aur mandar husn kā

dekhiye jo ghar nazar aatā hai vo ghar husn kā

āshnā haiñ jo vajūd-e-husn-e-qudrat se vo sab

jānte haiñ aap ko mahsūr-e-nūr-e-husn-e-rab

dil agar daanā buvad dar har-suḳhan asrār hast

chashm gar biinā buvad yūsuf ba-har-bāzār hast

husn hai maujud har ja chashm-e-bina chahiye

dida-e-dil khol kar han us ko dekha chahiye

us ka jalwa hai ayan gul-ha-e-ranga-rang se

sabze mein shaKHon mein ghar us ne kiya sau Dhang se

jaguzin hai raat din ye bahr-o-bar ke des mein

shahr mein aata hai ye lal-o-gohar ke bhes mein

husn-e-qudrat munhasir kuchh chhoTi chizon par nahin

balki ye jalwa-numa hai har jahan mein har kahin

koh-o-ragh-o-abr-o-baad-o-mahr-o-mah jinn-o-bashar

nur-e-husn-e-haq se hain ye sab munawwar sar-basar

hai jahan sara munawwar aur mandar husn ka

dekhiye jo ghar nazar aata hai wo ghar husn ka

aashna hain jo wajud-e-husn-e-qudrat se wo sab

jaante hain aap ko mahsur-e-nur-e-husn-e-rab

dil agar dana buwad dar har-suKHan asrar hast

chashm gar bina buwad yusuf ba-har-bazar hast