حسن قدرت

حسن ہے موجود ہر جا چشم بینا چاہئے

دیدۂ دل کھول کر ہاں اس کو دیکھا چاہئے

اس کا جلوہ ہے عیاں گلہائے رنگا رنگ سے

سبزے میں شاخوں میں گھر اس نے کیا سو ڈھنگ سے

جاگزیں ہے رات دن یہ بحر و بر کے دیس میں

شہر میں آتا ہے یہ لعل و گہر کے بھیس میں

حسن قدرت منحصر کچھ چھوٹی چیزوں پر نہیں

بلکہ یہ جلوہ نما ہے ہر جہاں میں ہر کہیں

کوہ و راغ و ابر و باد و مہر و مہ جن و بشر

نور حسن حق سے ہیں یہ سب منور سربسر

ہے جہاں سارا منور اور مندر حسن کا

دیکھیے جو گھر نظر آتا ہے وہ گھر حسن کا

آشنا ہیں جو وجود حسن قدرت سے وہ سب

جانتے ہیں آپ کو محصور نور حسن رب

دل اگر دانا بود در ہر سخن اسرار ہست

چشم گر بینا بود یوسف ب ہر بازار ہست