huzuri

huzūrī meñ ye mushkil thī ki ho kyā kuchh bayāñ pahle

vafā kā zikr pahle yā jafā kī dāstāñ pahle

niyāz-o-nāz meñ farq-e-marātib koī kyā samjhe

jabīñ pahle jhukī yā khiñch ke aaya āstāñ pahle

vahī hai vādī-e-aiman vahī tūr-e-tajallī hai

magar maiñ siikh luuñ ahl-e-mohabbat kī zabāñ pahle

kabhī ik aan meñ soz-e-nazar se jal uThe parde

kabhī barsoñ hue tāb-e-nazar ke imtihāñ pahle

bas ik do gaam aur aage hai is ke manzil-e-irfāñ

agar tai ho sake ye manzil-e-vahm-o-gumāñ se pahle

ḳhirad bhī rahbar-e-manzil hai lekin mo'atabar kam hai

ye shart-e-avvalīñ hai dil kī ho le ham-ināñ pahle

'munīr' āsāñ nahīñ hai rāh-e-ulfat se guzarnā bhī

ye lāzim hai ki ho le ḳhūgar-e-zabt-e-fuġhāñ pahle

huzuri mein ye mushkil thi ki ho kya kuchh bayan pahle

wafa ka zikr pahle ya jafa ki dastan pahle

niyaz-o-naz mein farq-e-maraatib koi kya samjhe

jabin pahle jhuki ya khinch ke aaya aastan pahle

wahi hai wadi-e-aiman wahi tur-e-tajalli hai

magar main sikh lun ahl-e-mohabbat ki zaban pahle

kabhi ek aan mein soz-e-nazar se jal uThe parde

kabhi barson hue tab-e-nazar ke imtihan pahle

bas ek do gam aur aage hai is ke manzil-e-irfan

agar tai ho sake ye manzil-e-wahm-o-guman se pahle

KHirad bhi rahbar-e-manzil hai lekin mo'atabar kam hai

ye shart-e-awwalin hai dil ki ho le ham-inan pahle

'munir' aasan nahin hai rah-e-ulfat se guzarna bhi

ye lazim hai ki ho le KHugar-e-zabt-e-fughan pahle