حضوری

حضوری میں یہ مشکل تھی کہ ہو کیا کچھ بیاں پہلے

وفا کا ذکر پہلے یا جفا کی داستاں پہلے

نیاز و ناز میں فرق مراتب کوئی کیا سمجھے

جبیں پہلے جھکی یا کھنچ کے آیا آستاں پہلے

وہی ہے وادیٔ ایمن وہی طور تجلی ہے

مگر میں سیکھ لوں اہل محبت کی زباں پہلے

کبھی اک آن میں سوز نظر سے جل اٹھے پردے

کبھی برسوں ہوئے تاب نظر کے امتحاں پہلے

بس اک دو گام اور آگے ہے اس کے منزل عرفاں

اگر طے ہو سکے یہ منزل وہم و گماں سے پہلے

خرد بھی رہبر منزل ہے لیکن معتبر کم ہے

یہ شرط اولیں ہے دل کی ہو لے ہم عناں پہلے

منیرؔ آساں نہیں ہے راہ الفت سے گزرنا بھی

یہ لازم ہے کہ ہو لے خوگر ضبط فغاں پہلے