ibaadat ka sach

'ibādat jaan kar

bahut chakkar lagā.e aspatāloñ ke

bahut tīmārdārī kī hai bīmāroñ kī lekin

junūñ ab bujh rahā hai

maiñ ab thakne lagā huuñ

thakan ab is qadar haavī hai mujh par

ki vo stool mere ḳhvāb meñ aane lagā hai

sahārā de ke biThlātā huuñ maiñ jis par

marīzoñ ko barābar doctor ke

ye kaam ab dūsroñ par chhoḌ duuñ

vasīla ban ke ḳhud

savāb un ko bhī thoḌā lūTne duuñ

jinheñ jannat meñ mere saath honā chāhiye

sahārā de ke mujh ko lā.eñge jo aspatāloñ meñ

mirī jānib se boleñge

mirā parchā lagā.eñge

tasallī de ke mujh ko chain se cigarette jalā.eñge

aur agar qismat huī achchhī to mumkin hai

vo nāzuk sāñvlī sī nurse

jis ko dekh kar maiñ is 'ibādat kī taraf rāġhib huā thā

un ke haath aa jaa.e shāyad

'ibaadat jaan kar

bahut chakkar lagae aspatalon ke

bahut timardari ki hai bimaron ki lekin

junun ab bujh raha hai

main ab thakne laga hun

thakan ab is qadar hawi hai mujh par

ki wo stool mere KHwab mein aane laga hai

sahaara de ke biThlata hun main jis par

marizon ko barabar doctor ke

ye kaam ab dusron par chhoD dun

wasila ban ke KHud

sawab un ko bhi thoDa luTne dun

jinhen jannat mein mere sath hona chahiye

sahaara de ke mujh ko laenge jo aspatalon mein

meri jaanib se bolenge

mera parcha lagaenge

tasalli de ke mujh ko chain se cigarette jalaenge

aur agar qismat hui achchhi to mumkin hai

wo nazuk sanwli si nurse

jis ko dekh kar main is 'ibaadat ki taraf raghib hua tha

un ke hath aa jae shayad