ادراک

میری پیدائش کے بعد

سب سے پہلے میری ماں پیدا ہوئی

پھر دوسرے رشتے

تعلق

درد اور وابستگی

کائناتی رشتوں کا بار گراں

اور پھر

چپکے سے تو پیدا ہوئی

رنگ

خوشبو

خواب سا تیرا وجود

دائرہ در دائرہ

بے کراں وسعت سمیٹے

اک اکائی

میں نے تیرے رنگ خوشبو خواب سے

اپنے اندر اک جہان تازہ کی تعمیر کی

اور سفر پر چل پڑا

مثل موج تہ نشیں

اپنے ہی ساحل کاٹتا

گہرائیوں سے جوجھتا

آگے بڑھا

تحت اندر تحت کے لمبے سفر میں

تیرا پیکر میرا خواب

خواب میرا حوصلہ

خواب تیری جستجو

اپنی تلاش

آج تک گرم سفر ہوں

اندرون ذات اندر ذات

ہر طرف تیرا وجود

ہر طرف میرا ظہور

عکس اندر عکس میں

خواب اندر خواب تو

خواب کا یہ سلسلہ

دائرہ در دائرہ

دور تک پھیلا ہوا

خواب کی تجسیم کاری

زندگی میری

مرا زاد سفر

موسموں کی زد پہ ہیں تنہا ہوں آج

ایک بوسیدہ شجر سا

وقت کے نیزوں سے چھلنی

زرد شاخوں سے تعلق قطع ہونے کا قلق

خشک پتوں سے سکڑتے ٹوٹتے رشتوں کا غم

اور تڑختی چھالوں سے کمزور تر ہوتی ہوئی وابستگی کے کرب سے خستہ تر حال

دم بہ دم نزدیک آتی دھند کے اس پار سے

سن رہا ہوں آنے والے موسموں کے تازہ دم قدموں کی چاپ

سبز شاخوں تازہ پتوں اور نئی چھالوں کے گیت

تو کہاں ہے میرے خواب

آخری لمحہ ہے

آ مری آنکھوں سے دیکھ

مجھ سے پہلے

مر رہی ہے

لمحہ لمحہ آج

ساری کائنات