ek thake-haare shaKHs ka bayan

ye mīloñ miil kā be-zā.iqa lambā safar achchhā nahīñ lagtā

yahāñ achchhā nahīñ lagtā vahāñ achchhā nahīñ lagtā

maza ye hai ki ab kuchh bhī mujhe achchhā nahīñ lagtā

magar har roz taaza ḳhuun kī gul-kāriyoñ

pichhle pahar ke ḳhvāb kī ayyāriyoñ se tar

kisī zaḳhmī darinde kī karāhoñ se labālab

din nikaltā hai

tulū' hotā huuñ maiñ bhī be-irāda

be-irāda Duub jaatā huuñ

kise mā'lūm ki

mābain-e-sub.h-o-shām jo ye din kā vaqfa hai

ye merī hasti-e-mauhūm kā be-rabt raqs-e-vālehāna hai

ki ġhā.eb-az-nazar

saffāk sehr-e-sāmrī kā kār-nāma hai

to kyā ye tai hai

maiñ dar-asl zinda huuñ

ye milon mil ka be-zaiqa lamba safar achchha nahin lagta

yahan achchha nahin lagta wahan achchha nahin lagta

maza ye hai ki ab kuchh bhi mujhe achchha nahin lagta

magar har roz taza KHun ki gul-kariyon

pichhle pahar ke KHwab ki ayyariyon se tar

kisi zaKHmi darinde ki karahon se labaalab

din nikalta hai

tulu' hota hun main bhi be-irada

be-irada Dub jata hun

kise ma'lum ki

mabain-e-subh-o-sham jo ye din ka waqfa hai

ye meri hasti-e-mauhum ka be-rabt raqs-e-walehana hai

ki ghaeb-az-nazar

saffak sehr-e-samri ka kar-nama hai

to kya ye tai hai

main dar-asl zinda hun