اک تھکے ہارے شخص کا بیان

یہ میلوں میل کا بے ذائقہ لمبا سفر اچھا نہیں لگتا

یہاں اچھا نہیں لگتا وہاں اچھا نہیں لگتا

مزہ یہ ہے کہ اب کچھ بھی مجھے اچھا نہیں لگتا

مگر ہر روز تازہ خون کی گل کاریوں

پچھلے پہر کے خواب کی عیاریوں سے تر

کسی زخمی درندے کی کراہوں سے لبالب

دن نکلتا ہے

طلوع ہوتا ہوں میں بھی بے ارادہ

بے ارادہ ڈوب جاتا ہوں

کسے معلوم کہ

مابین صبح و شام جو یہ دن کا وقفہ ہے

یہ میری ہستئ موہوم کا بے ربط رقص والہانہ ہے

کہ غائب از نظر

سفاک سحر سامری کا کارنامہ ہے

تو کیا یہ طے ہے

میں دراصل زندہ ہوں