اختتام سے پہلے

روز یوں ہی ہوتا ہے

سوچ کے دریچوں سے

یاد کی حسیں پریاں ناچتی اترتی ہیں

ہاتھ تھام کر میرا

سنگ سنگ چلتی ہیں

اور پھر وہی قصہ ابتدا سے آخر تک

حرف حرف

خوابوں کا پیرہن بدلتا ہے

اسکرین پہ جیسے کوئی فلم چلتی ہو

اور ہر تماشائی

دم بخود ہو حیراں ہو

اس ہجوم میں تنہا دیکھ کر کوئی مجھ کو

میرے پاس آتا ہے

ہر سوال آنکھوں کا

ایسے مجھ کو تکتا ہے

جیسے تذکرہ اس کا خود مری کہانی ہے

میں اسے پکڑنے کو

جب بھی ہاتھ پھیلاؤں

سلسلہ خیالوں کا ٹوٹ کر بکھر جائے

جیسے روشنی گل ہو اسکرین بجھ جائے

جیسے اختتام سے پہلے فلم ہی ٹھہر جائے

روز یوں ہی ہوتا ہے