اکیسویں صدی میں دم توڑتی ہوئی اک نظم

مجھے معلوم تھا بابا

بڑے بازار جاؤ گے

تو میرے واسطے کوئی

کھلونا لے کے آؤ گے

ارے بابا جو لائے ہو

کھلونا ہو نہیں سکتا

میں اس کے خوف سے گھر میں بھی تنہا سو نہیں سکتا

یہ اک بندوق ہے جو آگ کے شعلے اگلتی ہے

اسی سے زندگانی کی ہمیشہ شام ڈھلتی ہے

اسی بندوق کے ڈر سے یہاں ہنستا نہیں کوئی

یہ بستی کیسی بستی ہے جہاں بستا نہیں کوئی

جہاں بستا نہیں کوئی

پرندے خوف کے مارے نہیں پرواز کر پاتے

گلی میں کھیلنے بچے پلٹ کر اب نہیں آتے

مجھے بازار سے بابا بدل کر اور شے لا دو

کھلونا جس میں چاہت ہو

محبت کا ترانہ ہو

مگر بابا

تری چپ سے یہ میں نے راز جانا ہے

مجھے ایسا کھلونا اپنے ہاتھوں سے بنانا ہے