علم و خودی

جو علم تجھے پاس خودی پر نہ ابھارے

وہ لغو ہے یا لہو ہے یا سہو ہے پیارے

یہ سینۂ ارضی پہ مچلتے ہوئے دھارے

زندہ ہیں فقط ذوق تموج کے سہارے

حیف ایسے مسافر پہ جو اتنا بھی نہ سمجھا

کشتی حرکت میں ہے کہ چلتے ہیں کنارے

گہوارۂ تخریب ہے وہ علم معیشت

شاہیں کو جو تعمیر نشیمن پہ ابھارے

اعجاز خودی دیکھ کہ آہو کے یہ بچے

بھرنے لگے شیروں کے تعاقب میں طرارے

غیرت وہ حقیقت ہے کہ جب ہوتی ہے بیدار

سورج پہ جھپٹ پڑتے ہیں شبنم کے شرارے