insan ka dil

dil bhī kyā shai hai ki bholā bhī hai 'ayyār bhī hai

ḳhāksārī kā bhī rang is meñ hai pindār bhī hai

mutaharrik hai kabhī aur kabhī sākin hai

yā'nī ḳhāmosh bhī hai mā.il-e-guftār bhī hai

kufr-o-islām kā is ke nahīñ khultā 'uqda

haath meñ sub.ha bhī hai dosh pe zunnār bhī hai

majlis-e-‘ishq meñ paatā huuñ ise maiñ mad.hosh

mahfil-e-'aql meñ dekhā to ye hushiyār bhī hai

tāzgī chehre pe is ke hai udāsī hai kabhī

is ke āġhosh meñ sahrā bhī hai gulzār bhī hai

hai badī par kabhī maa.il kabhī nekī pe fidā

is kī fitrat meñ nihāñ nuur bhī hai naar bhī hai

dard-o-darmāñ se banā.ī hai baham is kī sarisht

aap ye apnā masīhā bhī hai bīmār bhī hai

kā'be meñ is ko haqīqat kā shanāsā paayā

sanamistāñ meñ ye bātil kā parastār bhī hai

is kī fitrat vo samundar hai ki jis meñ pinhāñ

mauj-e-iqbāl bhī hai varta-e-adbār bhī hai

zāhidī kā asar sajda hai peshānī par

'āshiqī ke liye gul-rang se sarshār bhī hai

hai kabhī ahl-e-tahakkum ke chaman kā gulchīñ

kabhī ahrār kā ye turra-e-dastār bhī hai

kabhī 'isyāñ se gurezāñ kabhī tā'at se nufūr

mustahiq ḳhuld kā dozaḳh kā sazā-vār bhī hai

naaz par hai kabhī āmāda kabhī garm-e-niyāz

be-ḳhabar apnī ḳhudī se hai ḳhabar-dār bhī hai

aañkh zāhir kī jo hai niiñd meñ rahtī hai magan

is ke andar magar ik dīda-e-bedār bhī hai

mudda'ī 'ishq-e-haqīqī kā ye rahtā hai magar

daulat-e-husn-e-majāzī kā ḳharīdār bhī hai

mā'bad-e-amn meñ kartā hai ye sajde paiham

sā'at-e-jang meñ āmāda-e-paikār bhī hai

dil bhi kya shai hai ki bhola bhi hai 'ayyar bhi hai

KHaksari ka bhi rang is mein hai pindar bhi hai

mutaharrik hai kabhi aur kabhi sakin hai

ya'ni KHamosh bhi hai mail-e-guftar bhi hai

kufr-o-islam ka is ke nahin khulta 'uqda

hath mein subha bhi hai dosh pe zunnar bhi hai

majlis-e-‘ishq mein pata hun ise main madhosh

mahfil-e-'aql mein dekha to ye hushiyar bhi hai

tazgi chehre pe is ke hai udasi hai kabhi

is ke aaghosh mein sahra bhi hai gulzar bhi hai

hai badi par kabhi mail kabhi neki pe fida

is ki fitrat mein nihan nur bhi hai nar bhi hai

dard-o-darman se banai hai baham is ki sarisht

aap ye apna masiha bhi hai bimar bhi hai

ka'be mein is ko haqiqat ka shanasa paya

sanamistan mein ye baatil ka parastar bhi hai

is ki fitrat wo samundar hai ki jis mein pinhan

mauj-e-iqbaal bhi hai warta-e-adbar bhi hai

zahidi ka asar sajda hai peshani par

'ashiqi ke liye gul-rang se sarshaar bhi hai

hai kabhi ahl-e-tahakkum ke chaman ka gulchin

kabhi ahrar ka ye turra-e-dastar bhi hai

kabhi 'isyan se gurezan kabhi ta'at se nufur

mustahiq KHuld ka dozaKH ka saza-war bhi hai

naz par hai kabhi aamada kabhi garm-e-niyaz

be-KHabar apni KHudi se hai KHabar-dar bhi hai

aankh zahir ki jo hai nind mein rahti hai magan

is ke andar magar ek dida-e-bedar bhi hai

mudda'i 'ishq-e-haqiqi ka ye rahta hai magar

daulat-e-husn-e-majazi ka KHaridar bhi hai

ma'bad-e-amn mein karta hai ye sajde paiham

sa'at-e-jang mein aamada-e-paikar bhi hai