insha

kabhī khul ke jab khilkhilātī hai inshā

fazāoñ meñ sargam bajātī hai inshā

har ik lab pe titlī biThātī hai inshā

jhaḌī qahqahoñ kī lagātī hai inshā

masarrat kī duniyā basātī hai inshā

mire ghar ko jannat banātī hai inshā

kabhī māysha ko hañsātī hai inshā

kabhī māysha ko rulātī hai inshā

kabhī paas us ko bulātī hai inshā

kabhī duur us ko bhagātī hai inshā

bahan se to kasrat karātī hai inshā

mire ghar ko jannat banātī hai inshā

kahānī sunātī hai naanī ko inshā

adā.eñ dikhātī hai naanī ko inshā

masarrat dilātī hai naanī ko inshā

divāna banātī hai naanī ko inshā

javānī buḌhāpe meñ laatī hai inshā

mire ghar ko jannat banātī hai inshā

kabhī DhūñD laatī hai naanū kā chashma

kabhī pheñk aatī hai naanū kā chashma

kabhī ḳhud lagātī hai naanū kā chashma

kahīñ se bhī paatī hai naanū kā chashma

to āvāz fauran lagātī hai inshā

mire ghar ko jannat banātī hai inshā

mobile par is tarah uñglī ghumā.e

ki jaise koī shaḳhs jaadū chalā.e

mobile ke parde pe hairat ugaa.e

hazāroñ tarah ke karishme dikhā.e

dikhā kar karishme rijhātī hai inshā

mire ghar ko jannat banātī hai inshā

kabhī koī khāne kā manzar dikhā.e

kabhī apnī uñglī se pizza banā.e

kabhī to mazedār murġhā pakā.e

salādoñ se khāne kī thālī sajā.e

kabhī chaa.e kaafī pilātī hai inshā

mire ghar ko jannat banātī hai inshā

falak paas jā kar kabhī muskurātī

kabhī chheḌtī to kabhī gudgudātī

mahak ko kabhī apnā kartab dikhātī

kabhī baby nannā ko poem sunātī

har ik aadmī ko lubhātī hai inshā

mire ghar ko jannat banātī hai inshā

malāhat meñ is kī chamak hai ġhazab kī

sarāpe meñ is ke lachak hai ġhazab kī

sadāoñ meñ is kī khanak hai ġhazab kī

adāoñ meñ is kī chahak hai ġhazab kī

ġhazab kā nazārā dikhātī hai inshā

mire ghar ko jannat banātī hai inshā

chahetī kisī kī kisī kī dulārī

kisī ko lage saare duniyā se nyārī

kisī ko ho mahsūs phūloñ se bhārī

sunny ko to hai jān-o-dil se bhī pyārī

bahut aamna ko bhī bhātī hai inshā

mire ghar ko jannat banātī hai inshā

mobile pe abbā ko dekhe to Dole

chahak kar lapak kar zabāñ apnī khole

masarrat se labrez alfāz bole

shahd kaan meñ apne abbā ke ghole

qatar tak mohabbat luTātī hai inshā

mire ghar ko jannat banātī hai inshā

mobile pe farhān ḳhaañ kī zabānī

har ik raat suntī hai vo ik kahānī

kahānī meñ aatī hai jab koī raanī

to bachchī se ban jaatī hai vo siyānī

bahut daad abbā se paatī hai inshā

mire ghar ko jannat banātī hai inshā

kabhī apne ghoḌe se bhauñ bhauñ karā.e

kabhī sher chīte ko bakrī banā.e

kabhī sar pe billī ke hāthī biThā.e

kabhī doremon ko bhī paTTī paḌhāye

anokhe tamāshe dikhātī hai inshā

mire ghar ko jannat banātī hai inshā

magar khāne piine se jī hai churātī

zarā der meñ muñh meñ luqma girātī

bahut apnī ammāñ se kasrat karātī

kabhī naach tigḌī kā bhī vo nachātī

khilāne meñ pāgal banātī hai inshā

mire ghar ko jannat banātī hai inshā

kabhi khul ke jab khilkhilati hai insha

fazaon mein sargam bajati hai insha

har ek lab pe titli biThati hai insha

jhaDi qahqahon ki lagati hai insha

masarrat ki duniya basati hai insha

mere ghar ko jannat banati hai insha

kabhi maysha ko hansati hai insha

kabhi maysha ko rulati hai insha

kabhi pas us ko bulati hai insha

kabhi dur us ko bhagati hai insha

bahan se to kasrat karaati hai insha

mere ghar ko jannat banati hai insha

kahani sunati hai nani ko insha

adaen dikhati hai nani ko insha

masarrat dilati hai nani ko insha

diwana banati hai nani ko insha

jawani buDhape mein lati hai insha

mere ghar ko jannat banati hai insha

kabhi DhunD lati hai nanu ka chashma

kabhi phenk aati hai nanu ka chashma

kabhi KHud lagati hai nanu ka chashma

kahin se bhi pati hai nanu ka chashma

to aawaz fauran lagati hai insha

mere ghar ko jannat banati hai insha

mobile par is tarah ungli ghumae

ki jaise koi shaKHs jadu chalae

mobile ke parde pe hairat ugae

hazaron tarah ke karishme dikhae

dikha kar karishme rijhati hai insha

mere ghar ko jannat banati hai insha

kabhi koi khane ka manzar dikhae

kabhi apni ungli se pizza banae

kabhi to mazedar murgha pakae

saladon se khane ki thaali sajae

kabhi chae kafi pilati hai insha

mere ghar ko jannat banati hai insha

falak pas ja kar kabhi muskuraati

kabhi chheDti to kabhi gudgudati

mahak ko kabhi apna kartab dikhati

kabhi baby nanna ko poem sunati

har ek aadmi ko lubhati hai insha

mere ghar ko jannat banati hai insha

malahat mein is ki chamak hai ghazab ki

sarape mein is ke lachak hai ghazab ki

sadaon mein is ki khanak hai ghazab ki

adaon mein is ki chahak hai ghazab ki

ghazab ka nazara dikhati hai insha

mere ghar ko jannat banati hai insha

chaheti kisi ki kisi ki dulari

kisi ko lage sare duniya se nyari

kisi ko ho mahsus phulon se bhaari

sunny ko to hai jaan-o-dil se bhi pyari

bahut aamna ko bhi bhati hai insha

mere ghar ko jannat banati hai insha

mobile pe abba ko dekhe to Dole

chahak kar lapak kar zaban apni khole

masarrat se labrez alfaz bole

shahd kan mein apne abba ke ghole

qatar tak mohabbat luTati hai insha

mere ghar ko jannat banati hai insha

mobile pe farhan KHan ki zabani

har ek raat sunti hai wo ek kahani

kahani mein aati hai jab koi rani

to bachchi se ban jati hai wo siyani

bahut dad abba se pati hai insha

mere ghar ko jannat banati hai insha

kabhi apne ghoDe se bhaun bhaun karae

kabhi sher chite ko bakri banae

kabhi sar pe billi ke hathi biThae

kabhi doremon ko bhi paTTi paDhaye

anokhe tamashe dikhati hai insha

mere ghar ko jannat banati hai insha

magar khane pine se ji hai churaati

zara der mein munh mein luqma giraati

bahut apni amman se kasrat karaati

kabhi nach tigDi ka bhi wo nachati

khilane mein pagal banati hai insha

mere ghar ko jannat banati hai insha