عشق سے ہے آشکار

بود و نبود حیات

سوز دل کائنات

راز حیات و ممات

رسم و رہ التفات

جلوۂ ذات و صفات

اک جہان ممکنات

عشق سے ہے آشکار

بود و نبود حیات

عشق کی تاثیر سے

تاب و تب آفتاب

کیفیت التہاب

نور رخ ماہتاب

قمقمہ آسا حباب

تند روئیٔ سحاب

بحر میں ہے اضطراب

عشق کی تاثیر سے

تاب و تب آفتاب

عشق کے انوار سے

زندگی میں چاندنی

یہ چمک یہ روشنی

زندگانی کی خوشی

راستی دل بستگی

عشق سے قائم ہوئی

راہ و رسم باہمی

عشق کے انوار سے

زندگی میں چاندنی

عشق ہی کے دم سے ہے

شورش بزم جہاں

رونق کون و مکاں

جسم میں روح رواں

زندگیٔ جاوداں

تیز گامی سے رواں

کارواں کا کارواں

عشق ہی کے دم سے ہے

شورش بزم جہاں

عشق ہے ام الکتاب

عشق خالق کا پیام

عشق ہے خیر الانام

اس کا ہے عالی مقام

کامران و شاد کام

بھیجتے ہیں صبح و شام

اس پہ سب لاکھوں سلام

عشق ہے ام الکتاب

عشق خالق کا پیام

بحر بے پایاں ہے عشق

موج بھی ساحل بھی عشق

جادہ و منزل بھی عشق

مژدہ و حاصل بھی عشق

گرمیٔ محض بھی عشق

لیلیٰ و محمل بھی عشق

قاتل و بسمل بھی عشق

بحر بے پایاں ہے عشق

موج بھی ساحل بھی عشق