جائزہ

اپنے احساس کے آئینے میں خود کو دیکھا

اک سمٹتا ہوا سایہ ہوں بکھرتا ہوا پھول

ایک تپتا ہوا صحرا ہوں سلگتا ہوا شہر

درد کا سرو رواں دکھ کا شجر دشت خلوص

ایک فن کار ہوں سرمایہ مرا خون جگر

زندگی بارہا شعلوں میں گرفتار ہوئی

بارہا فکر دل و جاں بھی شرر بار ہوئی

اپنے ماحول کے معیار پہ خود کو پرکھا

ایک مجرم ہوں مرا جرم وفا کی تشہیر

عظمت ظلم کا منکر ہوں شب غم کا حریف

آدمیت کا تقدس ہے مرے فن کا جمال

حق پرستی مرے افکار کا سر چشمہ ہے

ایک مشرک ہوں مرا شرک محبت سب سے

ایک کافر ہوں مرا کفر صداقت پہ یقیں

یہ در و بام ہوس تمکنت قصر ستم

رات کٹ جائے گی کھل جائے گا ظلمت کا بھرم