jadid tahqiq

sab se baḌe muhaqqiq karte the ye tamāshā

qabroñ se khīñchte the urdu adab kā lāsha

'saudā' kā ho vo ġhuncha 'akbar' kā yā ho jumman

duggī ho yā ki tiggī tola ho yā ki māshā

gahrī nazar se apnī har ik ko dekhte the

apne qalam se un ko hotī na thī nirāshā

saarī purānī qabreñ jab khod liiñ baḌoñ ne

zindoñ pe ho rahī hai ab mashq be-tahāshā

in kā bhī postmortem karne lage researcher

maqtal meñ aa rahe haiñ kuchh log be-tahāshā

ye fan pe tabsira to karte nahīñ zarā bhī

bas shaḳhsiyat kā un kī Dhote phireñge lāsha

tahqīq kā hai matter dūlhā bane the jab vo

shahnā.ī bhī bajī thī yā sirf Dhol tāshā

is shahr meñ sukūnat jab se huī hai un kī

urdu hī bolte haiñ yā aur koī bhāshā

hai harf un kā kaisā ḳhush-ḳhat haiñ yā ki bad-ḳhat

likhte haiñ sāf-suthrā yā haath meñ hai ra.asha

rakhte haiñ mūñchh dāḌhī yā chehra hai safā chaT

yā zulf jhūltī hai kāñdhoñ pe be-tahāshā

aḳhbār ḳhud haiñ paḌhte paḌhvā ke yā haiñ sunte

vo kaun se risāle kā rakhte haiñ tarāshā

cigarette ke alāva piite haiñ aur kyā kyā

khāte haiñ chocolate yā marġhūb hai batāshā

taftīsh ho rahī hai lañgDā ke kyoñ haiñ chalte

sasurāl meñ piTe kyā begam se be-tahāshā

tahqīq hai ye kaisī likhvā ke jab unhīñ se

thesis kareñ mukammal haañ kuchh badal deñ bhāshā

tahqīq-e-nau kī gaaḌī yūñhī ravāñ-davāñ hai

har jāmia meñ hotā hai bas yahī tamāshā

haq baat khul ke kah dī 'asrār' 'jām.ī' ne

rū-e-suḳhan kisī kī jānib nahīñ hai hāshā

sab se baDe muhaqqiq karte the ye tamasha

qabron se khinchte the urdu adab ka lasha

'sauda' ka ho wo ghuncha 'akbar' ka ya ho jumman

duggi ho ya ki tiggi tola ho ya ki masha

gahri nazar se apni har ek ko dekhte the

apne qalam se un ko hoti na thi nirasha

sari purani qabren jab khod lin baDon ne

zindon pe ho rahi hai ab mashq be-tahasha

in ka bhi postmortem karne lage researcher

maqtal mein aa rahe hain kuchh log be-tahasha

ye fan pe tabsira to karte nahin zara bhi

bas shaKHsiyat ka un ki Dhote phirenge lasha

tahqiq ka hai matter dulha bane the jab wo

shahnai bhi baji thi ya sirf Dhol tasha

is shahr mein sukunat jab se hui hai un ki

urdu hi bolte hain ya aur koi bhasha

hai harf un ka kaisa KHush-KHat hain ya ki bad-KHat

likhte hain saf-suthra ya hath mein hai rasha

rakhte hain munchh daDhi ya chehra hai safa chaT

ya zulf jhulti hai kandhon pe be-tahasha

aKHbar KHud hain paDhte paDhwa ke ya hain sunte

wo kaun se risale ka rakhte hain tarasha

cigarette ke alawa pite hain aur kya kya

khate hain chocolate ya marghub hai batasha

taftish ho rahi hai langDa ke kyon hain chalte

sasural mein piTe kya begam se be-tahasha

tahqiq hai ye kaisi likhwa ke jab unhin se

thesis karen mukammal han kuchh badal den bhasha

tahqiq-e-nau ki gaDi yunhi rawan-dawan hai

har jamia mein hota hai bas yahi tamasha

haq baat khul ke kah di 'asrar' 'jami' ne

ru-e-suKHan kisi ki jaanib nahin hai hasha