jannat-e-kashmir yahi hai

jis ḳhaak kī hai auj pe taqdīr yahī hai

jo radd-e-ġhulāmī kī hai iksīr yahī hai

bedārī-e-jamhūr kī tasvīr yahī hai

āzādī-e-afrād kī ta.amīr yahī hai

ai 'arsh' tire ḳhvāb kī ta.abīr yahī hai

firdaus-e-zamīñ jannat-e-kashmīr yahī hai

is se nahīñ achchhā koī gulzār ise dekh

is se nahīñ baḌh kar koī shahkār ise dekh

is se nahīñ ūñchā koī darbār ise dekh

is se nahīñ behtar koī dīdār ise dekh

fitrat ne jo khīñchī hai vo tasvīr yahī hai

firdaus-e-zamīñ jannat-e-kashmīr yahī hai

shirvānī-e-ma.asūm kī jāgīr na DhūñDo

shirvānī-e-mazlūm kī jāgīr na DhūñDo

shirvānī-e-maḳhdūm kī jāgīr na DhūñDo

shirvānī-e-marhūm kī jāgīr na DhūñDo

shirvānī-e-marhūm kī jāgīr yahī hai

firdaus-e-zamīñ jannat-e-kashmīr yahī hai

gul-posh makāñ aur gul-andām makīñ bhī

kamyāb nahīñ husn zamāne meñ kahīñ bhī

duniyā meñ bahut naqsh haiñ dilkash bhī hasīñ bhī

jo ḳhāma-e-qudrat kī hai tahrīr yahī hai

firdaus-e-zamīñ jannat-e-kashmīr yahī hai

jis husn kā ushshāq sunāte haiñ fasāna

jis husn ke har naaz pe miTtā hai zamāna

jis husn kā hai lab pe muġhannī ke tarānā

jis husn ke jalvoñ kī na had hai na Thikānā

us husn-e-jahāñ-tāb kī tanvīr yahī hai

firdaus-e-zamīñ jannat-e-kashmīr yahī hai

sarmāya-o-mehnat kā hai jo mas.ala-e-ḳhās

iflās-o-imārat kā hai jo mas.ala-e-ḳhās

dahqān kī azmat kā hai jo mas.la-e-ḳhās

mazdūr kī shaukat kā hai jo mas.ala-e-ḳhās

is mas.ala-e-ḳhās kī tafsīr yahī hai

firdaus-e-zamīñ jannat-e-kashmīr yahī hai

ulfat ke payambar haiñ parastār isī ke

iḳhlās kī mai piite haiñ mai-ḳhvār isī ke

mardān-e-mujāhid haiñ talabgār isī ke

hindū hoñ ki muslim haiñ giraftār isī ke

vābasta haiñ sab jis se vo zanjīr yahī hai

firdaus-e-zamīñ jannat-e-kashmīr yahī hai

sarmā.e ke beToñ kī huī ḳhuub dukāñ band

jāgīr-parastoñ pe huī rāh-e-amāñ band

mahkūmī-e-majbūr kī kab se thī zabāñ band

sadiyoñ kī ġhulāmī ke haiñ kis darja garāñ band

kāTegī jo ye band vo shamshīr yahī hai

firdaus-e-zamīñ jannat-e-kashmīr yahī hai

jis KHak ki hai auj pe taqdir yahi hai

jo radd-e-ghulami ki hai iksir yahi hai

bedari-e-jamhur ki taswir yahi hai

aazadi-e-afrad ki tamir yahi hai

ai 'arsh' tere KHwab ki tabir yahi hai

firdaus-e-zamin jannat-e-kashmir yahi hai

is se nahin achchha koi gulzar ise dekh

is se nahin baDh kar koi shahkar ise dekh

is se nahin uncha koi darbar ise dekh

is se nahin behtar koi didar ise dekh

fitrat ne jo khinchi hai wo taswir yahi hai

firdaus-e-zamin jannat-e-kashmir yahi hai

shirwani-e-masum ki jagir na DhunDo

shirwani-e-mazlum ki jagir na DhunDo

shirwani-e-maKHdum ki jagir na DhunDo

shirwani-e-marhum ki jagir na DhunDo

shirwani-e-marhum ki jagir yahi hai

firdaus-e-zamin jannat-e-kashmir yahi hai

gul-posh makan aur gul-andam makin bhi

kamyab nahin husn zamane mein kahin bhi

duniya mein bahut naqsh hain dilkash bhi hasin bhi

jo KHama-e-qudrat ki hai tahrir yahi hai

firdaus-e-zamin jannat-e-kashmir yahi hai

jis husn ka ushshaq sunate hain fasana

jis husn ke har naz pe miTta hai zamana

jis husn ka hai lab pe mughanni ke tarana

jis husn ke jalwon ki na had hai na Thikana

us husn-e-jahan-tab ki tanwir yahi hai

firdaus-e-zamin jannat-e-kashmir yahi hai

sarmaya-o-mehnat ka hai jo masala-e-KHas

iflas-o-imarat ka hai jo masala-e-KHas

dahqan ki azmat ka hai jo masla-e-KHas

mazdur ki shaukat ka hai jo masala-e-KHas

is masala-e-KHas ki tafsir yahi hai

firdaus-e-zamin jannat-e-kashmir yahi hai

ulfat ke payambar hain parastar isi ke

iKHlas ki mai pite hain mai-KHwar isi ke

mardan-e-mujahid hain talabgar isi ke

hindu hon ki muslim hain giraftar isi ke

wabasta hain sab jis se wo zanjir yahi hai

firdaus-e-zamin jannat-e-kashmir yahi hai

sarmae ke beTon ki hui KHub dukan band

jagir-paraston pe hui rah-e-aman band

mahkumi-e-majbur ki kab se thi zaban band

sadiyon ki ghulami ke hain kis darja garan band

kaTegi jo ye band wo shamshir yahi hai

firdaus-e-zamin jannat-e-kashmir yahi hai