jashn-e-jamhuriyat

javāniyāñ haiñ zor par shabāb kā zuhūr hai

ba-e-faiz-e-qalb-e-mutma.in nazar nazar ġhayūr hai

umañg hai tarañg hai nashāt hai surūr hai

nishān-e-zulmat-e-alam qarīb hai na duur hai

har ek qumquma yahāñ charāġh-e-koh-e-tūr hai

har ik fazā pe rañg hai har ek samt nuur hai

dharī huī haiñ baaġh meñ idhar-udhar surāhiyāñ

chhalak rahe haiñ jām-e-mai ba-faiz-e-sāqī-e-javāñ

chale haiñ bahr-e-mai-kashī shuyūḳh bhī ravāñ-davāñ

zabān-e-barg-e-gul pe hai ye nāra-e-tarb-nishāñ

qusūr-vār zohd hai piye jo be-qusūr hai

har ik fazā pe rañg hai har ek samt nuur hai

jhukī huī nigāh meñ adā-e-fitna-parvarī

hayā meñ shān-e-tamkanat jamāl meñ fusūñ-garī

naqāb-e-husn-posh meñ numū-e-shān-e-dil-barī

hijāb-e-sharm-kosh meñ ġhulū-e-nāz-e-kāfirī

butoñ kā husn-e-sāda aaj husn-e-pur-ġhurūr hai

har ik fazā pe rañg hai har ek samt nuur hai

uḌeñ chaman meñ Tahniyāñ pahan ke sabz sāriyāñ

chaleñ havā ke dosh par shamīm kī svāriyāñ

ufuq se tā ufuq ga.iiñ dhanak kī shoḳh dhāriyāñ

havā-e-tund kī nahīñ kahīñ bhī harzā-kāriyāñ

vatan kī is bahār meñ junūñ bhī bā-shu.ūr hai

har ik fazā pe rañg hai har ek samt nuur hai

nasīm-e-sub.h baaġh meñ gulāb ko thapak ga.ī

nigār-e-shāḳh-sār kī naqāb-e-ruḳh sarak ga.ī

havā-e-mushk-bār se kalī kalī chaTak ga.ī

ziyā-e-nau-bahār se kiran kiran damak ga.ī

ziyā-e-nau-bahār hai ki barq-e-koh-e-tūr hai

har ik fazā pe rañg hai har ek samt nuur hai

sabāhatoñ kī jaan hai har ek rū-e-ḳhush-numū

malāhatoñ kī kaan hai har ek zulf-e-mushkbū

bahisht-o-ḳhuld kī abas tujhe hai arsh justujū

malak-sarisht hai yahāñ har ek mard-e-ḳhūb-rū

har ik zan-e-nazar-pasand apsarā hai huur hai

har ik fazā pe rañg hai har ek samt nuur hai

jawaniyan hain zor par shabab ka zuhur hai

ba-e-faiz-e-qalb-e-mutmain nazar nazar ghayur hai

umang hai tarang hai nashat hai surur hai

nishan-e-zulmat-e-alam qarib hai na dur hai

har ek qumquma yahan charagh-e-koh-e-tur hai

har ek faza pe rang hai har ek samt nur hai

dhari hui hain bagh mein idhar-udhar surahiyan

chhalak rahe hain jam-e-mai ba-faiz-e-saqi-e-jawan

chale hain bahr-e-mai-kashi shuyuKH bhi rawan-dawan

zaban-e-barg-e-gul pe hai ye nara-e-tarb-nishan

qusur-war zohd hai piye jo be-qusur hai

har ek faza pe rang hai har ek samt nur hai

jhuki hui nigah mein ada-e-fitna-parwari

haya mein shan-e-tamkanat jamal mein fusun-gari

naqab-e-husn-posh mein numu-e-shan-e-dil-bari

hijab-e-sharm-kosh mein ghulu-e-naz-e-kafiri

buton ka husn-e-sada aaj husn-e-pur-ghurur hai

har ek faza pe rang hai har ek samt nur hai

uDen chaman mein Tahniyan pahan ke sabz sariyan

chalen hawa ke dosh par shamim ki swariyan

ufuq se ta ufuq gain dhanak ki shoKH dhaariyan

hawa-e-tund ki nahin kahin bhi harza-kariyan

watan ki is bahaar mein junun bhi ba-shuur hai

har ek faza pe rang hai har ek samt nur hai

nasim-e-subh bagh mein gulab ko thapak gai

nigar-e-shaKH-sar ki naqab-e-ruKH sarak gai

hawa-e-mushk-bar se kali kali chaTak gai

ziya-e-nau-bahaar se kiran kiran damak gai

ziya-e-nau-bahaar hai ki barq-e-koh-e-tur hai

har ek faza pe rang hai har ek samt nur hai

sabahaton ki jaan hai har ek ru-e-KHush-numu

malahaton ki kan hai har ek zulf-e-mushkbu

bahisht-o-KHuld ki abas tujhe hai arsh justuju

malak-sarisht hai yahan har ek mard-e-KHub-ru

har ek zan-e-nazar-pasand apsara hai hur hai

har ek faza pe rang hai har ek samt nur hai