jawaz

maiñ ek ḳhizāñ-dīda-e-āvāra musāfir

dānista nikal aayā huuñ duur apne vatan se

ab soch rahā huuñ ki javānī kā ye iqdām

kyā koī jasārat hai rivāyāt-e-kuhan se

is tarh se vijdān ke hoñToñ pe hai naala

jaise koī pā-basta musāfir sar-e-rāhe

yā jaise khañDar meñ koī manhūs parinda

pur-haul tarīqe se lagātār karāhe

duniyā ko ġharaz kyā hai mirī ġham-zadagī se

kyoñ saarā zamāna mirī jānib nigarāñ hai

dil ḳhush ho to nāloñ meñ bhī ik ruḳh hai tarab kā

dil TuuTe to naġhmoñ meñ bhī ik tarz-e-fuġhāñ hai

motī ko nikalnā hī paḌā batn-e-sadaf se

har gul chamanistān-e-jahāñ kā safarī hai

har mauj-e-havā ḳhāna-badoshī kā hai nauha

har zarre kī taqdīr yahāñ dar-ba-darī hai

ye phuul jo zīnat haiñ kisī jeb-o-qabā kī

gulshan kī kisī shāḳh-e-tamannā pe khile the

maidān kī vus'at meñ ye bikhre hue patte

ik roz havāoñ ko daraḳhtoñ pe mile the

main ek KHizan-dida-e-awara musafir

danista nikal aaya hun dur apne watan se

ab soch raha hun ki jawani ka ye iqdam

kya koi jasarat hai riwayat-e-kuhan se

is tarh se wijdan ke honTon pe hai nala

jaise koi pa-basta musafir sar-e-rahe

ya jaise khanDar mein koi manhus parinda

pur-haul tariqe se lagatar karahe

duniya ko gharaz kya hai meri gham-zadagi se

kyon sara zamana meri jaanib nigaran hai

dil KHush ho to nalon mein bhi ek ruKH hai tarab ka

dil TuTe to naghmon mein bhi ek tarz-e-fughan hai

moti ko nikalna hi paDa batn-e-sadaf se

har gul chamanistan-e-jahan ka safari hai

har mauj-e-hawa KHana-badoshi ka hai nauha

har zarre ki taqdir yahan dar-ba-dari hai

ye phul jo zinat hain kisi jeb-o-qaba ki

gulshan ki kisi shaKH-e-tamanna pe khile the

maidan ki wus'at mein ye bikhre hue patte

ek roz hawaon ko daraKHton pe mile the