jhelum ke kinare

maujoñ kī javānī meñ talātum hai abhī tak

sailāb-e-havā shorishoñ meñ gum hai abhī tak

bahte chale jaate haiñ ye mahke hue dhāre

karte haiñ ishāre

hañste haiñ nazāre

ābād haiñ ab tak mere jhelum ke kināre

ab tak usī andāz se hañstī haiñ fazā.eñ

ab tak usī ḳhushbū se mahaktī haiñ havā.eñ

aatī haiñ usī taur ghaTā-Top ghaTā.eñ

ab tak usī māhaul meñ palte haiñ nazāre

chāñd aur sitāre

ye nuur ke paare

ābād haiñ ab tak mire jhelum ke kināre

panghaT pe javāñ laḌkiyāñ aatī haiñ abhī tak

pariyoñ kī tarah nāchtī gaatī haiñ abhī tak

hañstā huā māhaul basātī haiñ abhī tak

āñkhoñ meñ jhalakte haiñ javānī ke sharāre

rañgīn sitāre

ma.asūm ishāre

ābād haiñ ab tak mire jhelum ke kināre

jāmun ke daraḳhtoñ kī vahī chhāñv ghanerī

aur un se zarā haT ke mire khet kī berī

rūmān kī duniyā abhī mahfūz hai merī

in sāyoñ tale ham ne ka.ī pahr guzāre

bastī se kināre

kyā din the hamāre

ābād haiñ ab tak mire jhelum ke kināre

duniyā ne na dekhā mirā rañgīn fasāna

jhelum ko magar yaad hai shā.er kā fasāna

parvān chaḌhā huuñ inhīñ maujoñ ke sahāre

dekhe haiñ nazāre

haiñ zehn meñ saare

ābād haiñ ab tak mire jhelum ke kināre

maujon ki jawani mein talatum hai abhi tak

sailab-e-hawa shorishon mein gum hai abhi tak

bahte chale jate hain ye mahke hue dhaare

karte hain ishaare

hanste hain nazare

aabaad hain ab tak mere jhelum ke kinare

ab tak usi andaz se hansti hain fazaen

ab tak usi KHushbu se mahakti hain hawaen

aati hain usi taur ghaTa-Top ghaTaen

ab tak usi mahaul mein palte hain nazare

chand aur sitare

ye nur ke pare

aabaad hain ab tak mere jhelum ke kinare

panghaT pe jawan laDkiyan aati hain abhi tak

pariyon ki tarah nachti gati hain abhi tak

hansta hua mahaul basati hain abhi tak

aankhon mein jhalakte hain jawani ke sharare

rangin sitare

masum ishaare

aabaad hain ab tak mere jhelum ke kinare

jamun ke daraKHton ki wahi chhanw ghaneri

aur un se zara haT ke mere khet ki beri

ruman ki duniya abhi mahfuz hai meri

in sayon tale hum ne kai pahr guzare

basti se kinare

kya din the hamare

aabaad hain ab tak mere jhelum ke kinare

duniya ne na dekha mera rangin fasana

jhelum ko magar yaad hai shaer ka fasana

parwan chaDha hun inhin maujon ke sahaare

dekhe hain nazare

hain zehn mein sare

aabaad hain ab tak mere jhelum ke kinare