jhumar

sahelī yuuñ to kuchh kuchh sāñvle se haiñ mire sājan

magar terī qasam behad rasīle haiñ mire sājan

jo maiñ kahtī huuñ us ko muskurā kar maan jaate haiñ

bahut pyāre baḌe hī bhole-bhāle haiñ mire sājan

maiñ un se prem kartī huuñ bhalā maiñ kyā batā.ūñgī

sakhī tū bol tujh ko kaise lagte haiñ mire sājan

ba-zāhir vo dikhā.ī dete haiñ ma.asūm duniyā ko

magar andar se mastāne rañgīle haiñ mire sājan

nahā dho kar maiñ apnī maañg jab sindūr se bhartī huuñ

to jaane zer-e-lab kyuuñ muskurāte haiñ mire sājan

khule bāloñ kī ḳhushbū dil ko matvālā banātī hai

mirā juuḌā ye kah kar khol dete haiñ mire sājan

chhupā letī huuñ chehra us ghaḌī maiñ laaj ke maare

mujhe jab sej par apnī bulāte haiñ mire sājan

na mujh se dil sambhaltā hai na āñchal hī sambhaltā hai

suhāne giit kyuuñ rātoñ ko gaate haiñ mire sājan

mujhe pardes se har baar gahna lā ke dete haiñ

sahelī mujh se behad pyaar karte haiñ mire sājan

ka.ī din se musalsal dekhtī huuñ un ko sapne meñ

papīhe sach batā kyā aane vaale haiñ mire sājan

chamaktā hai mire māthe pe jhūmar aaj kyuuñ jaise

ḳhushī kā chāñd ban kar ghar meñ aa.e haiñ mire sājan

savere se bahut bechain huuñ ghabrā rahī huuñ maiñ

sakhī pardes meñ kyā jaane kaise haiñ mire sājan

koilyā! dil meñ terī kuuk ab nashtar chubhotī hai

zamāna ho gayā hai mujh se bichhḌe haiñ mire sājan

ghaTā phir jhuum kar sāvan kī aa.ī mor phir bolā

mire sājan ab aa jaao ki jhūleñ baaġh meñ jhūlā

saheli yun to kuchh kuchh sanwle se hain mere sajan

magar teri qasam behad rasile hain mere sajan

jo main kahti hun us ko muskura kar man jate hain

bahut pyare baDe hi bhole-bhaale hain mere sajan

main un se prem karti hun bhala main kya bataungi

sakhi tu bol tujh ko kaise lagte hain mere sajan

ba-zahir wo dikhai dete hain masum duniya ko

magar andar se mastane rangile hain mere sajan

naha dho kar main apni mang jab sindur se bharti hun

to jaane zer-e-lab kyun muskuraate hain mere sajan

khule baalon ki KHushbu dil ko matwala banati hai

mera juDa ye kah kar khol dete hain mere sajan

chhupa leti hun chehra us ghaDi main laj ke mare

mujhe jab sej par apni bulate hain mere sajan

na mujh se dil sambhalta hai na aanchal hi sambhalta hai

suhane git kyun raaton ko gate hain mere sajan

mujhe pardes se har bar gahna la ke dete hain

saheli mujh se behad pyar karte hain mere sajan

kai din se musalsal dekhti hun un ko sapne mein

papihe sach bata kya aane wale hain mere sajan

chamakta hai mere mathe pe jhumar aaj kyun jaise

KHushi ka chand ban kar ghar mein aae hain mere sajan

sawere se bahut bechain hun ghabra rahi hun main

sakhi pardes mein kya jaane kaise hain mere sajan

koilya! dil mein teri kuk ab nashtar chubhoti hai

zamana ho gaya hai mujh se bichhDe hain mere sajan

ghaTa phir jhum kar sawan ki aai mor phir bola

mere sajan ab aa jao ki jhulen bagh mein jhula