jila

zainab maiñ terī bāñdī

tū aisī bā-hausla

is shaan se jaltī zamīn par chalī

ki sach ko zarūrat na rahī kisī hiil hujjat kī

tere liye āsmānoñ se koī mo.ajiza nahīñ utrā

ujḌā huā ghar be-bizā.atī zmīn-o-āsmān kī saḳhtiyāñ

aur terī istaqāmat

ki is qadar ḳhūñ-rezī ke ba.ad bhī yazīdī fat.h kā ḳhat na le sake

kisī ek fard-e-vāhid se nahīñ

to ek puure ġhalat nizām ke muqābil thī

ye vo maqām thā ki tārīḳh-dānoñ o mohaqqiqīn ne haar jiit ke nazriyāt ko alag andāz se dekhā

terī māmtā ko salām zainab apne jigar goshoñ kā ġham uThā kar ḳhud ko TūTne nahīñ diyā

aivānoñ meñ sar joḌe baiThe ahl-e-siyāsat

kisī natīje par nahīñ pahuñch paate

ki bachchoñ ko zab.h karne vaale

insān haiñ musalmān haiñ

zainab

ma.asūm alī asġhar ko zab.h karne vāloñ ko

tū ne ḳhudā kā ye farmān bāvar karāyā thā

allāh zālimoñ ko dost nahīñ rakhtā

karbalā ek rāh-e-hidāyat

raushnī zarā sī darz kisī jhurrī se dāḳhil ho kar

phaile hue añdhere par ġhālib aa jaatī hai

aur tārīkī ko savere meñ badal dene vaale rab ko ma.alūm hai

ki ishq ko baaqī rakhne ke liye lahū se ābiyārī kī ga.ī

lahū bahtā hai

to zamīñ zar-ḳhez hotī hai

vo taa.ef ho kuufa ho yā merī bad-nasīb zamīn

andhā hujūm hāthoñ meñ patthar liye

jilā ko bujhā detā chāhtā hai

jilā jo duā-go hai

ma.abūd unheñ baḳhsh de ye nahīñ jānte ye kyā kar rahe haiñ

jilā bātil ke hāthoñ meñ bai.at nahīñ kartī

jilā masīhā hai

mujhe maslūb karne vaalo shaqī-ul-qalb hukmarāno

bhalā phūTtī kirnoñ ko bhī koī salīb de sakā

jilā zainab hai

jo jale hue añdheroñ ke ba.ad

hone vaalī ujḌī sub.h se

us kaThin masāfat ko tai kartī hai

ki bahut sī ghuTan aur hazār sa.ūbatoñ ke ba.ad

ek vo maqām aatā hai

jo taḳht ko nishān-e-ibrat banā de

zainab main teri bandi

tu aisi ba-hausla

is shan se jalti zamin par chali

ki sach ko zarurat na rahi kisi hil hujjat ki

tere liye aasmanon se koi moajiza nahin utra

ujDa hua ghar be-bizaati zmin-o-asman ki saKHtiyan

aur teri istaqamat

ki is qadar KHun-rezi ke baad bhi yazidi fath ka KHat na le sake

kisi ek fard-e-wahid se nahin

to ek pure ghalat nizam ke muqabil thi

ye wo maqam tha ki tariKH-danon o mohaqqiqin ne haar jit ke nazriyat ko alag andaz se dekha

teri mamta ko salam zainab apne jigar goshon ka gham uTha kar KHud ko TuTne nahin diya

aiwanon mein sar joDe baiThe ahl-e-siyasat

kisi natije par nahin pahunch pate

ki bachchon ko zabh karne wale

insan hain musalman hain

zainab

masum ali asghar ko zabh karne walon ko

tu ne KHuda ka ye farman bawar karaya tha

allah zalimon ko dost nahin rakhta

karbala ek rah-e-hidayat

raushni zara si darz kisi jhurri se daKHil ho kar

phaile hue andhere par ghaalib aa jati hai

aur tariki ko sawere mein badal dene wale rab ko malum hai

ki ishq ko baqi rakhne ke liye lahu se aabiyari ki gai

lahu bahta hai

to zamin zar-KHez hoti hai

wo taef ho kufa ho ya meri bad-nasib zamin

andha hujum hathon mein patthar liye

jila ko bujha deta chahta hai

jila jo dua-go hai

mabud unhen baKHsh de ye nahin jaante ye kya kar rahe hain

jila baatil ke hathon mein baiat nahin karti

jila masiha hai

mujhe maslub karne walo shaqi-ul-qalb hukmarano

bhala phuTti kirnon ko bhi koi salib de saka

jila zainab hai

jo jale hue andheron ke baad

hone wali ujDi subh se

us kaThin masafat ko tai karti hai

ki bahut si ghuTan aur hazar saubaton ke baad

ek wo maqam aata hai

jo taKHt ko nishan-e-ibrat bana de