جو ہم پہ گزری

لوگ کہتے ہیں کہ گلشن میں بہار آئی تھی

باغباں نے گل خنداں کی قسم کھائی تھی

اک نئے دور کے آغاز کا دل کش نغمہ

گنگنائی تھی زباں وقت کی مبہم دھن میں

لوگ کہتے ہیں کہ اک صبح طرب آئی تھی

اپنی آغوش میں فردا کا فسوں لائی تھی

لوگ کہتے تھے کہ اب مے کدۂ ہستی میں

کوئی شاکی نہ رہے گا کسی مستانے سے

تشنہ کامی کی شکایت نہ کرے گا کوئی

یوں بدل جائے گا میخانے کا دستور کہن

اب تہی جام و سبو کی نہ حکایت ہوگی

نغمہ زن قسمت ارباب محبت ہوگی

لوگ کہتے ہیں کہ تزئین چمن ہو بھی چکی

رسم آرائش رخسار و دہن ہو بھی چکی

شانہ در گیسوئے لیلائے وطن ہو بھی چکا

دشت امروز سے ماضی کا کفن سل بھی چکا

قافلے منزل مقصود کو جا پہنچے ہیں

مرحلے قرب لب یار کے آ پہنچے ہیں

زندگی پھر بھی پریشاں سی نظر آتی ہے

عظمت حسن پشیماں سی نظر آتی ہے

دیکھ کر خلوت ہستی کی خموشی یارو

موت انگشت بدنداں سی نظر آتی ہے

شدت درد کا احساس سوا ہے اب بھی

شمع غم اور فروزاں سی نظر آتی ہے

غازۂ گل لئے رخسار خزاں آج بھی ہے

عندلیبوں کا وہی طرز فغاں آج بھی ہے

شمع بے نور یقیں تا بہ سحر جلتی ہے

زیست شرمندہ صاحب نظراں آج بھی ہے

ذہن مشرق پہ وہی خواب گراں آج بھی ہے

چشم مغرب بہ حقارت نگراں آج بھی ہے

آج تو وہ بھی پشیماں سے نظر آتے ہیں

جن کے کانوں نے نئے دور کے نغمات سنے

جن کی آنکھوں نے نئی صبح کے جلوے دیکھے

جن کے ہونٹوں پہ گہر بار تبسم مچلے

یہ فریب رہ مبہم کی شکستہ دیوار

کب تلک قصر تقدس کو سہارا دے گی

یہ طلسم شب بیمار رہے گا کب تک

خوں فشاں دیدۂ بے دار رہے گا کب تک