judai

judā.ī chāhe kisī tarah kī bhī ho ai dost

dil-o-jigar meñ ye kāñTe chubho hī detī hai

bachā ke rakhnā bahut hī muhāl hai is se

ye bahr-e-ġham meñ safīna Dubo hī detī hai

kisī kā is pe koī jabr-o-iḳhtiyār nahīñ

ye dil ke ḳhuun se dāman bhigo hī detī hai

hamārī aañkh se aañsū na kyoñ baheñ ai dost

ham ahl-e-dard judā.ī ke ġham se vāqif haiñ

tire firāq meñ kaise na dil se huuk uThe

ki ham aziyyat-e-shām-e-alam se vāqif haiñ

zarā sī Thes ke ḳhatre se dil dahaltā hai

ham apnī nāzukī-e-chashm-e-nam se vāqif haiñ

hamāre haal pe lekin na rakh nazar ai dost

tū apnī rāh-e-daraḳhshāñ kī samt dekh zarā

gul-e-tarab se jo dāman ko bharne vaalī hai

tū us nigāh-e-bahārāñ kī samt dekh zarā

vo chhuT rahī hai siyāhī ubhar rahī hai sahar

tulū-e-mahr-e-daraḳhshāñ kī samt dekh zarā

judai chahe kisi tarah ki bhi ho ai dost

dil-o-jigar mein ye kanTe chubho hi deti hai

bacha ke rakhna bahut hi muhaal hai is se

ye bahr-e-gham mein safina Dubo hi deti hai

kisi ka is pe koi jabr-o-iKHtiyar nahin

ye dil ke KHun se daman bhigo hi deti hai

hamari aankh se aansu na kyon bahen ai dost

hum ahl-e-dard judai ke gham se waqif hain

tere firaq mein kaise na dil se huk uThe

ki hum aziyyat-e-sham-e-alam se waqif hain

zara si Thes ke KHatre se dil dahalta hai

hum apni nazuki-e-chashm-e-nam se waqif hain

hamare haal pe lekin na rakh nazar ai dost

tu apni rah-e-daraKHshan ki samt dekh zara

gul-e-tarab se jo daman ko bharne wali hai

tu us nigah-e-bahaaran ki samt dekh zara

wo chhuT rahi hai siyahi ubhar rahi hai sahar

tulu-e-mahr-e-daraKHshan ki samt dekh zara