kar-e-behuda

apne hone

aur na hone meñ

ḳhushī kī ġham kī itmīnān kī tahqīq

be-masraf hai

aur ik sa.i-e-lā-hāsil ke sivā kuchh bhī nahīñ

ye zindagī

ik jañg-e-tahmīlī hai

aur maiñ

be-natīja jañg kā sar-bāz hoñ koī

jo behūda savāloñ se

azal se bar-sar-e-paikār

abad-āsār nā-paidā

maa.il

tār-e-abresham

vajūd

ik kirm kī mānind

ġhā.eb ho rahā hai dam-ba-dam

ye bhī ġhanīmat thā magar

resham ke ḳhvāhāñ hī kahāñ baaqī

kabhī ye sochtā huuñ maiñ

kisī goshe meñ baiThūñ

aur rujūa ik mard-e-kāmil se karūñ

lekin

mujhe bhī to ye pahle jānñā hogā

tifl-e-aql

kyuuñ az-balḳh tā-ba-qauniya

yuuñ ḳhvāb meñ Duubā rahā

yā phir

isī ek yaad ko unvān de duuñ ziist kā

to nau-damīda vo kalī

shāmil huī yā kī ga.ī

jo zindagī meñ

jis kī ḳhushbū ne mire ghar ko mahak se bhar diyā

tūtī-e-ḳhush-rañg-o-ilhāñ kī chahak se bhar diyā

maiñ ik muhaqqiq bhī rahā huuñ

haft-sāla daura-e-tahqīq kā

hāsil yahī hai

sar-ba-zānū dam-ba-ḳhud huuñ

āḳhirash sādiq-hidāyat

ḳhud-kushī se chāhtā kyā thā

natīja sifr hai

ye kār-e-behūda

yūñhī hotā rahā hai

be-sabab hotā rahegā

apne hone

aur na hone mein

KHushi ki gham ki itminan ki tahqiq

be-masraf hai

aur ek sai-e-la-hasil ke siwa kuchh bhi nahin

ye zindagi

ek jang-e-tahmili hai

aur main

be-natija jang ka sar-baz hon koi

jo behuda sawalon se

azal se bar-sar-e-paikar

abad-asar na-paida

mail

tar-e-abresham

wajud

ek kirm ki manind

ghaeb ho raha hai dam-ba-dam

ye bhi ghanimat tha magar

resham ke KHwahan hi kahan baqi

kabhi ye sochta hun main

kisi goshe mein baiThun

aur rujua ek mard-e-kaamil se karun

lekin

mujhe bhi to ye pahle jaanna hoga

tifl-e-aql

kyun az-balKH ta-ba-qauniya

yun KHwab mein Duba raha

ya phir

isi ek yaad ko unwan de dun zist ka

to nau-damida wo kali

shamil hui ya ki gai

jo zindagi mein

jis ki KHushbu ne mere ghar ko mahak se bhar diya

tuti-e-KHush-rang-o-ilhan ki chahak se bhar diya

main ek muhaqqiq bhi raha hun

haft-sala daura-e-tahqiq ka

hasil yahi hai

sar-ba-zanu dam-ba-KHud hun

aaKHirash sadiq-hidayat

KHud-kushi se chahta kya tha

natija sifr hai

ye kar-e-behuda

yunhi hota raha hai

be-sabab hota rahega