kar-e-mushkil

asr-e-hāzir meñ hai aisā sāhib-e-tadbīr kaun

bazm-e-gītī kī badal saktā hai ab taqdīr kaun

dāstān-e-shauq-o-mastī ik muamma ban ga.ī

sūrat-e-mansūr sar de kar likhe tafsīr kaun

mar-miTā dīvāna qais ab nāz-e-lailā kaun uThā.e

kohkan bhī chal basā laatā hai jū-e-shīr kaun

kāñpte haiñ bāġhbāñ kī sab nigāh-e-garm se

barq kī zad par karegā āshiyāñ ta.amīr kaun

ġhālib-e-ātish-navā kunj-e-lahad meñ hai ḳhamosh

soz se dil ke bhare naġhmāt meñ tāsīr kaun

hai bahut mushkil badalnā mahfil-e-hastī kā rang

saaz ko rakh kar uThā.e haath meñ shamshīr kaun

aql-o-dil kī kashmakash mujh ko to le Duubī 'munīr'

kahiye donoñ meñ hai āḳhir lā.eq-e-tāzīr kaun

asr-e-hazir mein hai aisa sahib-e-tadbir kaun

bazm-e-giti ki badal sakta hai ab taqdir kaun

dastan-e-shauq-o-masti ek muamma ban gai

surat-e-mansur sar de kar likhe tafsir kaun

mar-miTa diwana qais ab naz-e-laila kaun uThae

kohkan bhi chal basa lata hai ju-e-shir kaun

kanpte hain baghban ki sab nigah-e-garm se

barq ki zad par karega aashiyan tamir kaun

ghaalib-e-atish-nawa kunj-e-lahad mein hai KHamosh

soz se dil ke bhare naghmat mein tasir kaun

hai bahut mushkil badalna mahfil-e-hasti ka rang

saz ko rakh kar uThae hath mein shamshir kaun

aql-o-dil ki kashmakash mujh ko to le Dubi 'munir'

kahiye donon mein hai aaKHir laeq-e-tazir kaun