کار مشکل

عصر حاضر میں ہے ایسا صاحب تدبیر کون

بزم گیتی کی بدل سکتا ہے اب تقدیر کون

داستان شوق و مستی اک معمہ بن گئی

صورت منصور سر دے کر لکھے تفسیر کون

مر مٹا دیوانہ قیس اب ناز لیلیٰ کون اٹھائے

کوہ کن بھی چل بسا لاتا ہے جوئے شیر کون

کانپتے ہیں باغباں کی سب نگاہ گرم سے

برق کی زد پر کرے گا آشیاں تعمیر کون

غالب آتش نوا کنج لحد میں ہے خموش

سوز سے دل کے بھرے نغمات میں تاثیر کون

ہے بہت مشکل بدلنا محفل ہستی کا رنگ

ساز کو رکھ کر اٹھائے ہاتھ میں شمشیر کون

عقل و دل کی کشمکش مجھ کو تو لے ڈوبی منیرؔ

کہئے دونوں میں ہے آخر لائق تعزیر کون