kab se mahw-e-safar ho

sājida kun yugoñ kī masāfat sameTe hue

is bayābāñ meñ yūñhī bhaTaktī rahogī

in bagūloñ ke hamrāh yuuñ raqs kartī rahogī

kitne sahrāoñ meñ tum ne phoḌe haiñ paañv ke chhāle

kitnī bedār rātoñ se māñgā hai tum ne ḳhirāj-e-tamannā

sājida kuchh kaho

hijr kī kin zamānoñ meñ ashkoñ kī maalā piroī

kin hisāboñ chukāyā qarz-e-junūñ

kaun se marhaloñ se guzar kar banā ruuh kā pairahan

kis tarah jaañ se guzre haiñ tūfān-e-ġham

kis tarah nand āñdhī kī yalġhār meñ

tum ne apnī ridā ko sambhālā

kaise yaḳh-basta tanhā.iyoñ meñ

jashn-e-rūh-o-dil-o-jāñ manāyā

shola-e-ārzū meñ

kaise harf-o-navā ko tapāyā

jāgtī raat kī tīrgī ko

kis tarah matl.a-e-nūr-e-yazdāñ banāyā

kitne sajdoñ se apnī jabīñ ko sajāyā

sājida

dard ke rāstoñ par

kab se mahv-e-safar ho

tum ne in rahguzāroñ kī banjar zamīñ meñ

kitne raftār-o-guftār ke gul khilā.e

is aqūbat-kada kī siyāhī meñ

kitne charāġh-e-tamannā jalā.e

sājida

is tag-o-dau se tum ne

kyā kabhī chehra-e-zindagī ko sañvārā

kyā kisī dil meñ koī sitāra utārā

kyā zamāne kī raftār badlī

kyā kisī tapte sahrā ke zarroñ ko kundan banāyā

kitne zaḳhmoñ pe insāñ ke marham lagāyā

zulm kī dāstāñ ko kabhī harf-e-shīrīñ banāyā

sājida

shaam hai zindagī kī

thak ke so jā.ūñ sab haav bhuul jaao

kaḌī dhuup ke kos-dar-kos

agle zamānoñ ke naqsh-e-qadam haiñ

rañg-o-mausam badalne lagā hai

tum masīhā nahīñ

thak ke so jaao

raqs-e-junūñ bhuul jaao

sajida kun yugon ki masafat sameTe hue

is bayaban mein yunhi bhaTakti rahogi

in bagulon ke hamrah yun raqs karti rahogi

kitne sahraon mein tum ne phoDe hain panw ke chhaale

kitni bedar raaton se manga hai tum ne KHiraj-e-tamanna

sajida kuchh kaho

hijr ki kin zamanon mein ashkon ki mala piroi

kin hisabon chukaya qarz-e-junun

kaun se marhalon se guzar kar bana ruh ka pairahan

kis tarah jaan se guzre hain tufan-e-gham

kis tarah nand aandhi ki yalghaar mein

tum ne apni rida ko sambhaala

kaise yaKH-basta tanhaiyon mein

jashn-e-ruh-o-dil-o-jaan manaya

shola-e-arzu mein

kaise harf-o-nawa ko tapaya

jagti raat ki tirgi ko

kis tarah matla-e-nur-e-yazdan banaya

kitne sajdon se apni jabin ko sajaya

sajida

dard ke raston par

kab se mahw-e-safar ho

tum ne in rahguzaron ki banjar zamin mein

kitne raftar-o-guftar ke gul khilae

is aqubat-kada ki siyahi mein

kitne charagh-e-tamanna jalae

sajida

is tag-o-dau se tum ne

kya kabhi chehra-e-zindagi ko sanwara

kya kisi dil mein koi sitara utara

kya zamane ki raftar badli

kya kisi tapte sahra ke zarron ko kundan banaya

kitne zaKHmon pe insan ke marham lagaya

zulm ki dastan ko kabhi harf-e-shirin banaya

sajida

sham hai zindagi ki

thak ke so jaun sab haw bhul jao

kaDi dhup ke kos-dar-kos

agle zamanon ke naqsh-e-qadam hain

rang-o-mausam badalne laga hai

tum masiha nahin

thak ke so jao

raqs-e-junun bhul jao