kachcha gulabi dhaga main

kachchā gulābī dhāgā maiñ

vaqt kī uñglī bedardī se

be-parvā.ī se bechāre

dhāgoñ ko lipTāne vaalī

tezī se harakat meñ aa kar

ghuum rahī hai

aur maiñ us kī uñglī par

lāchārī se

lipaT rahī huuñ

bachī huuñ behad thoḌī sī

kachchā gulābī dhāgā maiñ

Dor maiñ sachche resham kī

kaash ki is lā-fānī rang ko

be-raunaq adh-marī fazā meñ

manzar-dar-manzar chhiTkātī

kaash ye zinda

ye tābinda

rang na.e kuchh rang banātā

kaash fanā se shart lagātā

chhiTak chhiTak kar

phir dhartī ko phūloñ kā ham-rang banātā

kaash ye zālim vaqt Thahartā

kaash gulābī rang na martā

kachchā gulābī dhāgā maiñ

Dor maiñ sachche resham kī

ḳhush-rangī īmān mirā

majbūrī pahchān mirī

ḳhush-rangī kī Dor sañbhāle

majbūrī ke ruup dikhātī

vaqt kī uñglī

ghuum rahī hai

rafta rafta ab

taqrīban

sard ishāroñ par maiñ us ke rote rote

lipaT chukī huuñ

bachī huuñ behad thoḌī sī

kachchā gulābī dhāgā maiñ

kachchā gulābī dhāgā maiñ

Dor maiñ sachche resham kī

kachcha gulabi dhaga main

waqt ki ungli bedardi se

be-parwai se bechaare

dhagon ko lipTane wali

tezi se harakat mein aa kar

ghum rahi hai

aur main us ki ungli par

lachaari se

lipaT rahi hun

bachi hun behad thoDi si

kachcha gulabi dhaga main

Dor main sachche resham ki

kash ki is la-fani rang ko

be-raunaq adh-mari faza mein

manzar-dar-manzar chhiTkati

kash ye zinda

ye tabinda

rang nae kuchh rang banata

kash fana se shart lagata

chhiTak chhiTak kar

phir dharti ko phulon ka ham-rang banata

kash ye zalim waqt Thaharta

kash gulabi rang na marta

kachcha gulabi dhaga main

Dor main sachche resham ki

KHush-rangi iman mera

majburi pahchan meri

KHush-rangi ki Dor sanbhaale

majburi ke rup dikhati

waqt ki ungli

ghum rahi hai

rafta rafta ab

taqriban

sard ishaaron par main us ke rote rote

lipaT chuki hun

bachi hun behad thoDi si

kachcha gulabi dhaga main

kachcha gulabi dhaga main

Dor main sachche resham ki