kahani jo adhuri thi

ye kis ne aag hote roz-o-shab meñ

mujh ko maañ kah kar pukārā hai

ki jis kī pyaar meñ Duubī huī āvāz ne

har aag ko shabnam banāyā hai

ki ab rutba mujhe maañ kā dilāyā hai

mire bachche

maiñ terī muntazar

shāyad azal se thī

tire hī vāste shāyad maiñ jannat chhoḌ kar

duniyā meñ aa.ī thī

ki ab jo tujh ko paayā hai

mire jalte badan meñ māmtā kī chhāñv utrī hai

mire bachche

maiñ ab sahrā nahīñ

aisā shajar huuñ

jis ke saa.e meñ

faqat tū hī nahīñ

be-ḳhvāb merī zindagī bhī

bahut āsūdgī meñ kho ga.ī hai

kahānī jo adhūrī thī mukammal ho ga.ī hai

ye kis ne aag hote roz-o-shab mein

mujh ko man kah kar pukara hai

ki jis ki pyar mein Dubi hui aawaz ne

har aag ko shabnam banaya hai

ki ab rutba mujhe man ka dilaya hai

mere bachche

main teri muntazar

shayad azal se thi

tere hi waste shayad main jannat chhoD kar

duniya mein aai thi

ki ab jo tujh ko paya hai

mere jalte badan mein mamta ki chhanw utri hai

mere bachche

main ab sahra nahin

aisa shajar hun

jis ke sae mein

faqat tu hi nahin

be-KHwab meri zindagi bhi

bahut aasudgi mein kho gai hai

kahani jo adhuri thi mukammal ho gai hai