kai sal baad

mile ham jo ab ke ka.ī saal ba.ad

tumheñ bhī malāmat mujhe bhī malāl

tumhāre bhī chehre ke phīke the rañg

merā chehra jaise bhaTaktā malañg

ka.ī raaz chup kī sadāoñ meñ the

hamārī sulagtī vafāoñ meñ the

ajab vaqt o manzar ajab māh-o-sāl

na koī javāb aur na koī savāl

baḌī koshisheñ kī ki ik ho sakeñ

zarā khul ke hañs leñ zarā ro sakeñ

guzishta ke kuchh to nishāñ dho sakeñ

magar ab ye mumkin kahāñ thā 'nadīm'

na pahle se din the na pahle sī raat

na pahle se lahje na pahle sī baat

na pahle sā ham pe mohabbat kā jaal

na pahle sā jīvan na hī māh-o-sāl

mile hum jo ab ke kai sal baad

tumhein bhi malamat mujhe bhi malal

tumhaare bhi chehre ke phike the rang

mera chehra jaise bhaTakta malang

kai raaz chup ki sadaon mein the

hamari sulagti wafaon mein the

ajab waqt o manzar ajab mah-o-sal

na koi jawab aur na koi sawal

baDi koshishen ki ki ek ho saken

zara khul ke hans len zara ro saken

guzishta ke kuchh to nishan dho saken

magar ab ye mumkin kahan tha 'nadim'

na pahle se din the na pahle si raat

na pahle se lahje na pahle si baat

na pahle sa hum pe mohabbat ka jal

na pahle sa jiwan na hi mah-o-sal