kaweri

tū ai kaveri hai rashk-e-rūd-e-nīl

terī ik ik mauj mauj-e-salsabīl

paḌ rahā hai tujh pe aks-e-jibra.īl

tujh se hai sairāb gulzār-e-ḳhalīl

aaj bhī hūrān-e-jannat be-shumār

dekh kar tujh ko qatār-andar-qatār

roz aatī haiñ nahāne ke liye

raqs kā tūfāñ uThāne ke liye

nuur kā dariyā bahāne ke liye

naġhma-e-firdaus gaane ke liye

ḳhizr ko hai āb-e-haivāñ par ġhurūr

faiz jaarī hai tirā nazdīk-o-dūr

terā har qatra hai bahr-e-be-karāñ

jis meñ pinhāñ haiñ hazāroñ naddiyāñ

terā naġhma gā rahā hai har kisāñ

jis se paiham raqs meñ hai āsmāñ

tere dam se haiñ ye sab gul-kāriyāñ

lahlahātī haiñ jo saarī khetiyāñ

bel-būTe aur har shāḳh-o-shajar

gulshan-e-hastī kā har barg-o-samar

bulbul-o-qumrī-o-shāhīñ be-ḳhatar

sab parinde aur charinde bahra-var

muflis-o-mohtāj hoñ yā ahl-e-zar

zālim-o-mazlūm hoñ yā tājvar

sab pe terā faiz yaksāñ hai mudām

tere aage ek haiñ aaqā ġhulām

tu ai kaweri hai rashk-e-rud-e-nil

teri ek ek mauj mauj-e-salsabil

paD raha hai tujh pe aks-e-jibrail

tujh se hai sairab gulzar-e-KHalil

aaj bhi huran-e-jannat be-shumar

dekh kar tujh ko qatar-andar-qatar

roz aati hain nahane ke liye

raqs ka tufan uThane ke liye

nur ka dariya bahane ke liye

naghma-e-firdaus gane ke liye

KHizr ko hai aab-e-haiwan par ghurur

faiz jari hai tera nazdik-o-dur

tera har qatra hai bahr-e-be-karan

jis mein pinhan hain hazaron naddiyan

tera naghma ga raha hai har kisan

jis se paiham raqs mein hai aasman

tere dam se hain ye sab gul-kariyan

lahlahati hain jo sari khetiyan

bel-buTe aur har shaKH-o-shajar

gulshan-e-hasti ka har barg-o-samar

bulbul-o-qumri-o-shahin be-KHatar

sab parinde aur charinde bahra-war

muflis-o-mohtaj hon ya ahl-e-zar

zalim-o-mazlum hon ya tajwar

sab pe tera faiz yaksan hai mudam

tere aage ek hain aaqa ghulam