KHamosh aawaz

kitne din meñ aa.e ho sāthī

mere sote bhaag jagāne

mujh se alag is ek baras meñ

kyā kyā biitī tum pe na jaane

dekho kitne thak se ga.e ho

kitnī thakan āñkhoñ meñ ghulī hai

aao tumhāre vāste sāthī

ab bhī mirī āġhosh khulī hai

chup ho kyūñ? kyā soch rahe ho

aao sab kuchh aaj bhulā do

aao apne pyāre sāthī

phir se mujhe ik baar jilā do

bolo sāthī kuchh to bolo

kab tak āḳhir aah bharūñgī

tum ne mujh par naaz kiye haiñ

aaj maiñ tum se naaz karūñgī

aao maiñ tum se ruuTh sī jā.ūñ

aao mujhe tum hañs ke manā lo

mujh meñ sach-much jaan nahīñ hai

aao mujhe hāthoñ pe uThā lo

tum ko merā ġham hai sāthī

kaise ab is ġham ko bhulā.ūñ

apnā khoyā jīvan bolo

aaj kahāñ se DhūñD ke lā.ūñ

ye na samajhnā mere sājan

de na sakī maiñ saath tumhārā

ye na samajhnā mere dil ko

aaj tumhārā dukh hai gavārā

ye na samajhnā maiñ ne tum se

jaan ke yuuñ muñh moḌ liyā hai

ye na samajhnā maiñ ne tum se

dil kā naatā toḌ liyā hai

ye na samajhnā tum se maiñ ne

aaj kiyā hai koī bahānā

duniyā mujh se ruuTh chukī hai

sāthī tum bhī ruuTh na jaanā

aaj bhī sājan maiñ huuñ tumhārī

aaj bhī tum ho mere apne

aaj bhī in āñkhoñ meñ base haiñ

pyāre ke anmiT gahre sapne

dil kī dhaḌkan Duub bhī jaa.e

dil kī sadā.eñ thak na sakeñgī

miT bhī jā.ūñ phir bhī tum se

merī vafā.eñ thak na sakeñgī

ye to pūchho mujh se chhuT kar

tere dil par kyā kyā guzrī

tum bin merī naav to sājan

aisī Duubī phir na ubhrī

ek tumhārā pyaar bachā hai

varna sab kuchh luT sā gayā hai

ek musalsal raat ki jis meñ

aaj mirā dam ghuT sā gayā hai

aaj tumhārā rasta takte

maiñ ne puurā saal bitāyā

kitne tūfānoñ kī zad par

maiñ ne apnā diip jalāyā

tum bin saare mausam biite

aa.e jhoñke sard havā ke

narm gulābī jaaḌe guzre

mere dil meñ aag lagā ke

sāvan aayā dhuum machātā

ghir-ghir kaale bādal chhā.e

mere dil par jam se ga.e haiñ

jaane kitne gahre saa.e

chāñd se jab bhī bādal guzrā

dil se guzrā aks tumhārā

phuul jo chaTke maiñ ne jaanā

tum ne shāyad mujh ko pukārā

aa.iiñ bahāreñ mujh ko manāne

tum bin maiñ to muñh na bolī

laakh fazā meñ giit se gūñje

lekin maiñ ne aañkh na kholī

kitnī nikhrī sub.heñ guzrīñ

kitnī mahkī shāmeñ chhā.īñ

mere dil ko duur se takne

jaane kitnī yādeñ aa.iiñ

itnī muddat ba.ad to pirītam

aaj kalī hirdai kī khilī hai

kitnī rāteñ jaag ke sājan

aaj mujhe ye raat milī hai

bolo sāthī kuchh to bolo

kuchh to dil kī baat batāo

aaj bhī mujh se duur rahoge

aao mire nazdīk to aao

aao maiñ tum ko bahlā lūñgī

baiTh to jaao mere sahāre

aaj tumheñ kyuuñ ġham hai bolo

aaj to maiñ huuñ paas tumhāre

achchhā merā ġham na bhulāo

merā ġham har ġham meñ samolo

is se achchhī baat na hogī

ye to tumheñ manzūr hai bolo

mere ġham ko mere shā.er

apne javāñ gītoñ meñ rachā lo

mere ġham ko mere shā.er

saare jag kī aag banā lo

mere ġham kī aañch se sāthī

chauñk uThegā azm tumhārā

baat to jab hai lākhoñ dil ko

chhū le apne pyaar kā dhārā

maiñ jo tumhāre saath nahīñ huuñ

dil ko mat māyūs karo tum

tum ho tanhā tum ho akele

aisā kyuuñ mahsūs karo tum

aaj hamāre lākhoñ sāthī

sāthī himmat haar na jaao

aaj karoḌoñ haath baḌheñge

ek zarā tum haath baḌhāo

achchhā ab to hañs do sāthī

varna dekho ro sī paḌūñgī

bolo sāthī kuchh to bolo

aaj maiñ sach-much tum se laḌūñgī

jaag uThī lo duniyā merī

aa.ī hañsī vo lab pe tumhāre

dekho dekho merī jānib

dauḌ paḌe haiñ chāñd sitāre

jhilmil jhilmil kirneñ aa.iiñ

mujh ko chandan-hār pahnāne

jagmag jagmag taare aa.e

phir se merī maañg sajāne

aa.iiñ havā.eñ jhāñjh bajātī

gītoñ morā añgnā jaagā

more māthe jhūmar damkā

more hāthoñ kañgnā jaagā

jaag uThā hai saarā aalam

jaag uThī hai raat milan kī

aao zamīñ kī god meñ sājan

sej sajī hai aaj dulhan kī

aao jaatī raat hai sāthī

pyaar tumhārā dil meñ bhar luuñ

aao tumhārī god meñ sājan

thak kar āñkheñ band sī kar luuñ

uTTho sāthī duur ufuq kā

narm kinārā kaañp uThā hai

mere dil kī dhaḌkan ban kar

sub.h kā taarā kaañp uThā hai

dil kī dhaḌkan Duub ke rah jā

jaagī nabzo tham sī jaao

phir se merī be-nam āñkho

patthar ban kar jam sī jaao

mere ġham kā ġham na karo tum

achchhā ab se ġham na karūñgī

mere irādoñ vaale sāthī

jaao maiñ himmat kam na karūñgī

tum ko hañs kar ruḳhsat kar duuñ

sab kuchh maiñ ne hañs ke sahā hai

tum bin mujh meñ kuchh na rahegā

yuuñ bhī ab kyā ḳhaak rahā hai

dekho! kitne kaam paḌe haiñ

achchhā ab mat der karo tum

kaise jam kar rah se ga.e ho

itnā mat andher karo tum

bolo tum ko kaise rokūñ

duniyā sau ilzām dharegī

aise pāgal pyaar ko sāthī

saarī ḳhilqat naam dharegī

aao maiñ uljhe baal svārūñ

mujh se koī kaam to le lo

phir se gale ik baar lagā ke

pyaar se merā naam to le lo

achchhā sāthī! jaao sidhāro

ab kī itne din na lagānā

pyāsī āñkheñ raah takeñgī!

lekin Thahro Thahro sāthī

dil ko zarā tayyār to kar luuñ

aao mire pardesī sājan!

aao maiñ tum ko pyaar to kar luuñ

kitne din mein aae ho sathi

mere sote bhag jagane

mujh se alag is ek baras mein

kya kya biti tum pe na jaane

dekho kitne thak se gae ho

kitni thakan aankhon mein ghuli hai

aao tumhaare waste sathi

ab bhi meri aaghosh khuli hai

chup ho kyun? kya soch rahe ho

aao sab kuchh aaj bhula do

aao apne pyare sathi

phir se mujhe ek bar jila do

bolo sathi kuchh to bolo

kab tak aaKHir aah bharungi

tum ne mujh par naz kiye hain

aaj main tum se naz karungi

aao main tum se ruTh si jaun

aao mujhe tum hans ke mana lo

mujh mein sach-much jaan nahin hai

aao mujhe hathon pe uTha lo

tum ko mera gham hai sathi

kaise ab is gham ko bhulaun

apna khoya jiwan bolo

aaj kahan se DhunD ke laun

ye na samajhna mere sajan

de na saki main sath tumhaara

ye na samajhna mere dil ko

aaj tumhaara dukh hai gawara

ye na samajhna main ne tum se

jaan ke yun munh moD liya hai

ye na samajhna main ne tum se

dil ka nata toD liya hai

ye na samajhna tum se main ne

aaj kiya hai koi bahana

duniya mujh se ruTh chuki hai

sathi tum bhi ruTh na jaana

aaj bhi sajan main hun tumhaari

aaj bhi tum ho mere apne

aaj bhi in aankhon mein base hain

pyare ke anmiT gahre sapne

dil ki dhaDkan Dub bhi jae

dil ki sadaen thak na sakengi

miT bhi jaun phir bhi tum se

meri wafaen thak na sakengi

ye to puchho mujh se chhuT kar

tere dil par kya kya guzri

tum bin meri naw to sajan

aisi Dubi phir na ubhri

ek tumhaara pyar bacha hai

warna sab kuchh luT sa gaya hai

ek musalsal raat ki jis mein

aaj mera dam ghuT sa gaya hai

aaj tumhaara rasta takte

main ne pura sal bitaya

kitne tufanon ki zad par

main ne apna dip jalaya

tum bin sare mausam bite

aae jhonke sard hawa ke

narm gulabi jaDe guzre

mere dil mein aag laga ke

sawan aaya dhum machata

ghir-ghir kale baadal chhae

mere dil par jam se gae hain

jaane kitne gahre sae

chand se jab bhi baadal guzra

dil se guzra aks tumhaara

phul jo chaTke main ne jaana

tum ne shayad mujh ko pukara

aain bahaaren mujh ko manane

tum bin main to munh na boli

lakh faza mein git se gunje

lekin main ne aankh na kholi

kitni nikhri subhen guzrin

kitni mahki shamen chhain

mere dil ko dur se takne

jaane kitni yaaden aain

itni muddat baad to piritam

aaj kali hirdai ki khili hai

kitni raaten jag ke sajan

aaj mujhe ye raat mili hai

bolo sathi kuchh to bolo

kuchh to dil ki baat batao

aaj bhi mujh se dur rahoge

aao mere nazdik to aao

aao main tum ko bahla lungi

baiTh to jao mere sahaare

aaj tumhein kyun gham hai bolo

aaj to main hun pas tumhaare

achchha mera gham na bhulao

mera gham har gham mein samolo

is se achchhi baat na hogi

ye to tumhein manzur hai bolo

mere gham ko mere shaer

apne jawan giton mein racha lo

mere gham ko mere shaer

sare jag ki aag bana lo

mere gham ki aanch se sathi

chaunk uThega azm tumhaara

baat to jab hai lakhon dil ko

chhu le apne pyar ka dhaara

main jo tumhaare sath nahin hun

dil ko mat mayus karo tum

tum ho tanha tum ho akele

aisa kyun mahsus karo tum

aaj hamare lakhon sathi

sathi himmat haar na jao

aaj karoDon hath baDhenge

ek zara tum hath baDhao

achchha ab to hans do sathi

warna dekho ro si paDungi

bolo sathi kuchh to bolo

aaj main sach-much tum se laDungi

jag uThi lo duniya meri

aai hansi wo lab pe tumhaare

dekho dekho meri jaanib

dauD paDe hain chand sitare

jhilmil jhilmil kirnen aain

mujh ko chandan-haar pahnane

jagmag jagmag tare aae

phir se meri mang sajaane

aain hawaen jhanjh bajati

giton mora angna jaga

more mathe jhumar damka

more hathon kangna jaga

jag uTha hai sara aalam

jag uThi hai raat milan ki

aao zamin ki god mein sajan

sej saji hai aaj dulhan ki

aao jati raat hai sathi

pyar tumhaara dil mein bhar lun

aao tumhaari god mein sajan

thak kar aankhen band si kar lun

uTTho sathi dur ufuq ka

narm kinara kanp uTha hai

mere dil ki dhaDkan ban kar

subh ka tara kanp uTha hai

dil ki dhaDkan Dub ke rah ja

jagi nabzo tham si jao

phir se meri be-nam aankho

patthar ban kar jam si jao

mere gham ka gham na karo tum

achchha ab se gham na karungi

mere iradon wale sathi

jao main himmat kam na karungi

tum ko hans kar ruKHsat kar dun

sab kuchh main ne hans ke saha hai

tum bin mujh mein kuchh na rahega

yun bhi ab kya KHak raha hai

dekho! kitne kaam paDe hain

achchha ab mat der karo tum

kaise jam kar rah se gae ho

itna mat andher karo tum

bolo tum ko kaise rokun

duniya sau ilzam dharegi

aise pagal pyar ko sathi

sari KHilqat nam dharegi

aao main uljhe baal swarun

mujh se koi kaam to le lo

phir se gale ek bar laga ke

pyar se mera nam to le lo

achchha sathi! jao sidhaaro

ab ki itne din na lagana

pyasi aankhen rah takengi!

lekin Thahro Thahro sathi

dil ko zara tayyar to kar lun

aao mere pardesi sajan!

aao main tum ko pyar to kar lun